اش يعني آثار ؟؟
// أكتوبر 19th, 2009 // 1 Comment » // اللي شفتو ...]
من اغرب الغريب اني خلقت في اطهر مكان في الارض و احبها إلى الله عز و جل و سكنت فيها لاكتر من ٢٣ سنة
و لغاية قبل ٤ سنين بس كانت اول مره ليا فحياتي اسمع و اشوف اثار في المدينة المنورة غير اللي حفظناها لدرجة ايقنا تماماً ان اي شي غير مسجد سيدي الرسول عليه الصلاة و السلام و مسجد قباء و القبلتين ولا شهداء احد يعتبر اساسا شي خرافة ومررره مالو اي علاقة بالاثار
وللمتعمق في اسرار المدينة المنورة يلاقي خير كثير منه خفي عن الكثير = )
و المحزن المبكي بالنسبة لاي شاب عاش في المدينة و تربى فيها
انه نسبة كبييرة كتير من شبابها و سكانها عندهم جهل كبير جداً في حكاية الاماكن الاثرية
و الاثر الكبير اللي كان من بعد سيدي و سيد الخلق رسول الله عليه وعلى اله افضل الصلاة و اتم التسليم ..!
بشكل عام ..
ما درسنا فمدارسنا اكتر من ١٠ ٪ عن دي الاثار او اماكنها او فضلها حتى
و درسنا باكتر من دي النسبة بكتييير عن الاثار في قصر المصمك و الدرعية و غيرها ..
حتى اي شخص الان حاب يعرف عن اثارنا هنا و حب يعمل سيرش بسيط في النت او بالطرق التقليدية ..
فمن البديهي جداً .. انه اذا بحث عن ١٠ اماكن اثرية يزورها في السعودية .. ٥ منها ع الاقل ماهي من اثار الرسول عليه الصلاة و السلام ، اللي انا برايي الشخصي اعتبره عليه صلاة الله وسلامه من اهم الاسباب اللي عمرت دي الارض بالزات = )
اللي خلاني اكتب عن دا الموضوع ..
اتقدرلي يكون لي علاقة ولو من بعيد شويا مع احد الناس المهتمين باثر مهم جداً في المدينة المنورة ..
واللي هوا بئر غرس ..
ويقع حالياً داخل املاك لاحد الاشخاص من اهل المدينة الافاضل ..
المهم في الموضوع ان صاحب دي الاملاك كان اتكلم عن انه يتمنى يكون دا المكان مشهد تاريخي لبئر هام لينا احنا كمسلمين برأيي بسبب حب الرسول عليه الصلاة و السلام فكان عليه الصلاة و السلام يحب ماء دي البير ، حتى انه وصى سيدنا علي لما حضرته الوفاة بأن [إذا مت فاغسلني من بئر غرس بسبع قرب]..
حتى انه قال فيها عليه افضل الصلاة و السلام عن ابن عمر رضي الله عنه قال: قال رسول الله صلى الله عليه وسلم وهو قاعد عند بئر غرس [رأيت الليلة كأني جالس على عين من عيون الجنة]، يعني بئر غرس.
فاي شي اكتر من كدا .. ؟
فصاحب دي الاملاك كان عنده اقتراحات بانه يكون دا المكان مزار و ينعمل كمكان اثري حتى يتمكن الناس من شوفته او ع الاقل المرور فيه تحت اي شرط كان نضمن فيه تعليم الناس و ننتبهلهم من اي بدعة ممكن تجي فبالهم عند زيارة دا المكان ..
لكن للاسف بشكل مباشر او غير مباشر اتواجهت دي الهمة بصد شديد و تهديد فبعض الاحيان بهدم المكان و ازالة الاثر من اصلو .. = )
و دا مجرد مثال بسييييط جداً لما واجهته اثار كتيرة في المدينة المنورة من هدم و ازالة عن بكرة ابيها بدون ترك اي دليل او اثر يدل عليها بعد كدا
ومن اهمها و الجدير بالذكر فيها القرار اللي صدر قريب بهدم مسجد الفتح في منطقة المساجد السبعة اللي وقعت فيها غزوة الخندق
واللي بقي منها فقط ٣ مساجد هي مسجد الفتح و مسجد سيدنا سلمان الفارسي و مسجد سيدنا عمر ..
بينما الخطة المحطوطة ع زعم تطوير المنطقة بمبلغ ٢١٤ مليون دولار لازالة المساجد التاريخية و استبدال مكانها مسجد كبير ما سمعت للان واللهي انو في احد من اهل المدينة اللي اعرفهم ع الاقل صلى فيه ركعة ..
و مسجد الفضيخ اللي ازيل من فترة طويلة و للاسف اغلبنا كان ما يعرف دا المسجد من اساسو
دا غير الابار اللي انهدمت و اهمها بئر الخاتم و غير المزارع اللي ازيلت و النخل الشهير في مزرعة سيدنا سلمان الفارسي اللي ازيل قبل سنوات قليله
و غير الاسوار و المباني اللي ما نعرف عنها ولا عن مكانها اي شي
و التناقض العجيب فنفس الوقت .. انه من كم سنة اتكتب في الجرايد عن ترميم حصن اليهودي كعب بن الاشرف في المدينة المنورة
وماتكتب اي شي عن هدم مكان واحد من اللي ذكرتها فوق دي
و من التناقض الغريب و الاغرب و العجيب جدا جدا برايي
انه ايهما احق بالاهتمام و الترميم اكتر الحصن ولا بير العهن مسلن ؟
مشربة ام ابراهيم و لا مدائن صالح مثلاً ؟
٢١٤ مليون دولار لهدم مساجد تاريخية و اثرية وليها فضل علينا و على كل مسلم بيتنفس فدي الارض ،، ولا اقل من ربع دا المبلغ لترميم مسجد واحد من السبعة اللي اتهدمت ؟؟
مدائن صالح اللي بيندفع الان مليارات عشان تكون معلم سياحي عالمي و تدخل عجايب الدنيا
و ينبني فيها اكتر من ٣ منتجعات سياحية لمنطقة كان الرسول عليه الصلاة و السلام يكره المرور فيها و يحث ع الاسراع لمن يوصلها و يمشي من جمبها و احنا بننظملها رحلات شبه يومية و معسكرات و مخيمات بالهبل جمبها ؟؟
مشاريع ياكترها ولا مشروع صغير انو يصير في كشك صغييييير قدام كل اثر من دي الاثار العظيمة يعلمو الناس فيلو الصح من الغلط و الحلال من الحرام وسور حوالينو احنا راضيين عشان ما يخش اي احد ؟؟
و سنة بعد سنة بينسوا اهل المدينة و شبابها دي الاثار
فابدن ماهو غريب اليوم وانا بتكلم عن شوية اثار انا شفتها بعيني قدام اصحابي في القهوة و اليوم مي موجودة .. و النص التاني من الشباب ماهو مصدقني لمن احلف انو اصلن في اثار تانية عمرهم ما سمعو عنها انها موجودة في المدينة المنورة
![Reblog this post [with Zemanta]](http://img.zemanta.com/reblog_e.png?x-id=847d2ea4-9188-4d33-944b-e533a665240a)
