6argoo3a

كيف ممكن Twitter يخليك تتعلم تصوير اكتر .. ؟

// يوليو 15th, 2009 // 6 Comments » // SLiDE, اي حاجــ ة ...!, تصـاوير

اوكي في البداية دا مقال لانسان رائع جدن اسمو Steve Berardi ترجمتو كدا بسرعة مع شويت تعديلات ^_^

فكرة المقال عن انو كيف ممكن نخلي التويتر مكان يطورنا من ناحية التصوير اكتر .. !!

( اكمل قراءة التدوينة )

Wadi Al Lith

// أبريل 13th, 2009 // 9 Comments » // تصـاوير

من اروع المراريت اللي استمتعت فيها بحياتي من كتر المناظر اللي شفتها ..

فيوم من الايامات اتعرفت ع دا الانسان اللا اسمو Yann ..
شب جدن محترم من دولة شقيقة نوعن ما p=

المهم دا الانسان كنت فاندلسية داكا اليوم و قاعد اشتغل على وحدة من التصاوير اللي مصورها اول عشين اسلمها للناس .. و بس يجيني فجأة ويفتح سيرة انو هوا مصوراتي كمان و يحب حكاية التصوير ..

وانو دا الانسان طلع عندو عادة غريبة ولا هواية هيا ما ادري والله
انو كل اسبوع يركب الجيب اللي معاه و يروح يسستكشف اماكن في السعودية ..

قعد يحكيني ع الاماكن اللي راحها و كدا و يوريني صور انا من جد ساعتها انهبلت .. انوو احححه من جد في شي زي كدا هنا ؟؟

بعدها بكمن يوم اتصلبي و رحتلو عشين نرتب لدي الطلعة الخرافية كانت نوعن ما ..

كان المخطط انو من صبحية ربنا كدا ع الساعة 05:30 نتقابل عند هارلي ديفيدسون اللي في الاندلس ..
ومن هناك رح نتحرك .. ^_^

طبعن بحكم انو انا زيهم تمامن مواعيدي بالميلي .. فيوم الجمعة 3 – ابريل الساعة 06:00 كنت هناك و كان بيستنانا الشب التالت معانا فدي الرحلة Roman

( اتنينهم شغالين في القنصلية الفرنسية بس انا عرفت كل واحد فيهم لحال p= )

Yann the Driver

طبعن كل اللي كان معانا موية و الكاميرا حقتي و حقتو و بنزين و مدري ايش كمان و شوية سناكس ع الطريق ..
تعليمات اخينا يان انو كان ما ينفع نشيل معانا اكل ( كبسة مسلن ) هوا يا دوب سندوتشات اخدتها من ميد يومتها ^_^

بعد بساعتين و نص تقريباً او اكتر شوية وصلنا لحد الطايف .. لانو ما كان يمدينا نخش مكة فلفينا من عند طريق الناس التانيين

و المكان اللي كنا رايحينو يعني تحت الطايف في الجنوب ابو 200 كيلو تانية ..
ع اساس يكون مفرق الطريق اللي رح نوصلو .. بنكون ساعتها على ارتفاع 2500 متر تقريباً داك المكان اسمو قرى بني سعد
ومن هداك المفرق رح نبدا ننزل نزول للوادي ( وادي الليث ) الين نوصل لاخر شي عند الليث ومنها نرجع على جدة ..

( مكان المفرق )

اول ما وصلنا قريب المفرق دا كانت الساعة تقريبن 9 و نص .. تشوفو كيف الغيوم مرره كانت بالاكبر حاجة و قريييبة بالاقوى شي .. فكملنا طلوع شويا بعد المفرق عشين نوصل للحكاية دي ^_^

Brrrrr

بعدها بدينا نكمل نزول عشين نوصل للوادي ..
بعد اول 100 متر تقريبن و قفنا عشين ناخد فطورنا .. عن نفسي توست جبنة و هما كانوا جايبين تفاح و موز و مدري ايش << اش يحسوا فيه الناس لما يفطروا زي كدا ؟؟ p=

هنا يبان الطريق اللي بنمشي فيه الين الوادي تحت هنا الارتفاع كان حوالي 2000 متر و شويا

طبعن الطريق كان مرره خطير و ان كان عليا فكنت جداً مبسوط بصراحة ..
كان يدوب السيارة تمشي لحالها بسبب انو الطريق ضيق و كلو حجار و رملة و زي كدا .. و دا الانسان اللي اسمو يان بصراحة سوييق .. اتوقع انو يرجع اصلو من هنا من عندنا عتيبي ولا حارثي ولا شي زي كدا p=

ع الساعة 11 تقريبن كنا وصلنا لقرية فنص الجبل ..

طبعن جناااان مووت دا المكان ..
وانفلت اصور صراحة فدا المكان .. الين جونا اتنين طلعوا ساكنين جوت القرية ..
حلفو بالمية يمين انو الا نتفضل نشرب الشاي ..

يان و من ورا ابو خالد و طوير ^_^

وهنا قعدوا يحكونا حكاية القرية دي .. دول الاتنين الشيبة اسمو ابو خالد .. و التاني الشباب اسمو طوير ..
قالولنا انو دا المكان اللي احنا وصلنالو يسموه ( فرعة ابن الحارث ) .. وكانت عبارة عن قرى كتير قريبة من بعض لمن الوادي و دي القرية هيا اكبرهم

دا طوير يكون ابن شيخ القبيلة .. و الشيخ ابو خالد عمرو دحين قريب الـ 70 ولا 80 سنة

فبيقلنا انو دي القرية يعرفوا تاريخها بالتواتر .. يعني كل مين يسمع من ابوه ولا جدو و يحكي اللي بعدو .. فهوا يقول انو لغاية تقريبا ثامن جد ليهم يقول انو مو هوا اللي بنى دي القرية اللي قبلو بنوها ..
يعني بالتقدير كدا عمر دي القرية يزيد عن 700 سنة ..
كانو اهل القرية ساكنين فيها الين قريب يعني سابوها من حوالي 20 – 25 سنة .. وكل صيف تقريباً او كل فترة بيجوها اهلها بيزوروها و يقعدو فيها و الين دحين بيوتهم موجودة ..
حتى ابو خالد قعد يحكينا انو دا بيت فلان و دا بيت مدري مين و زي كدا ^_^
ابو خالد و طوير يقولو انو تقريباُ هما الوحيدين اللي مداومين على دي القرية يعني كل اسبوع عشرة ايام يجوها يقعدو فيها ..

حتى انو آخر 500 متر تقريباً من الطريق اللي يوصل للقرية يقولو انو الجرافة حقت الحكومة ما قدرت توصل عشين تفتح الطريق فوقفت قبل القرية بـ 500 متر و اللي كمل الطريق هما دول الاتنين قعدو يشتغلو عليها باليدين واخدت معاهم شغل سنة تقريبا ^_^

طبعاً دا الكلام كلو سار واحنا بنشرب شاي معاهم من اروع الشايات اللي في الدنيا ..
مع انو ماني من شريبة الشاي بس داكا كان لو طعم خرافي ( شكلهم دافين شي كانو p= ) .. السؤال كان انو كيف كانوا عايشين اهل القرية .. ؟

فاللي قالوه انهم كانوا دايمن يزرعو بر و شعير و يعيشو اغلب حياتهم عليها بالاضافة لشوية ناس منهم يرعو غنم في الجبل و زي كدا ..
بالطرف التاني من القرية كان في منحلة برضو من عمر القرية كمان .. و يقولوا انهم كانوا برضو يستفيدوا من دا العسل الين قريب دحين سار خفيف يطلع ..
و الموية كانت من نبعة فوسط الجبل بيسحبو الموية منها عن طريق مواسير ممددينها ..

هنا طبعن كان اهم شي انو نروح لدي النبعة لانو كانت فرصة حلوة ^_^

ouch *_*

كدا كنا بنلحق الماسورة عشين نوصل للنبعة فوسط الجبل

انا شربت من هنا بس التنحين اللي معايا ما رضيو قال يقرفو

الين وصلنا هناك وكانت من جد شي رهيييب انو موية من وسط الجبل بتخرج و باردة زي التلج و من جد طعمها شي ما ينوصف ^_^

بعد ماشفنا النبعة رجعنا للقرية عشين نشوف البيوت

كلها كدا مبنية و مكونة من الحجر

و الحصن دا حقهم اللي فنص القرية اللي كان مبني عشين يتحمو فيه لمن يسير حرب ولا احد يهجم ع القرية

ابو خالد يقول انو ما عمرو سارتلهم حرب الحمدلله بس دي عمرها اكتر من 700 سنة

و هنا كانت المناحل حقتهم

هادي اللي من جد كيف اتبنت .. سبحان الله

و من هنا يبان الطريق اللي يوصل للقرية و كيف اللي اشتغلوه بيدهم

و هادا السور اللي في نص الجبل تكون المقبرة حقت اهل القرية من يوم ما ربي خلق القرية يقولو ^_^
( الله يرحمهم و يغفرلهم و يعافيهم و يعفو عنهم )

السور و من عند الغامق اللي فوق تقريبن يبدا الطريق اللي باليد

جلسة الشاهي المعتبرة p=

بعدها كان ابو خالد و طوير و واحد تاني جا من اهل القرية و كانو مسوينلنا عيش حب من حق القرية و عدس برضو زارعينو في القرية .. اكلنا معاهم لقمتين من جد ما تتنسي و بعدين انو سار لازم نمشي عشين نكمل طريقنا للوادي = )

هادي الحجرات رهيبين كانهم ادمي ( هنا وقفنا اتغدينا ^_^ )

ع الساعة 2 و نص تقريبن كنا وصلنا لبداية الوادي .. وادي الليث
وهنا وقفنا عشين نتغدا ع اساس = )

طبعن في الوادي دا كان من احلى الاشياء اللي ممكن الواحد يمشي فيها بحياتو بسبب انو الجو و طبيعة المكان اللي بتتغير كل شويا من غيم لبرد لنباتات و انواع حيوانات و طيور غريبة = )

من الحيوانات اللي شفتها هناك كان في جمال طبعن و حمير و خراويف .. وكان في وحدة من الاماكن في نمر عربي بس كان براس الجبل بعيييد و هنا ساعتها الواحد بدي يخاف p=

يا مطره صبي صبي

طبعن اغلب الطيور و الحيوانات بديت تطلع بعد ما بديت تصب مطرة رااايقة و وشويا سارت مطرة مطرة

ساعتها كانت صح الحيوانات و الطيور بتجي من كزا مكان بتتجمع عند الموية عشين تشرب بس بنفس الوقت كانت مشكلة بالنسبة لينا عشين حكاية لا نعلق بالسيارة فوقتها سرنا نسرع بالمشي وما طولنا كتير

دا طير اسمو الـ Egret

كملنا الطريق اللي كلو كان حجار و صخور و بصراحة كان متعب مررة بس طول ما الواحد ماشي مستمع سبحان الله

المسافة حقت الوادي ( طولو يعني ) كان حوالي المفروض 80 كيلو متر لكنو اخد وقت ما يقارب الـ اربع ساعات او اكتر شويا ..

وصلنا لنهاية الوادي حوالي الساعة 6 كدا وكان هنا بداية طريق الاسفلت اللي بيودي لليث ..

منبع العيون الحارة

في الطريق و ع حسب الخطة كان المفروض نوصل لمكان اسمو نبع العيون الحارة

هادي عبارة عن موية حارة بتخرج من وسط الأرض بس ماهي كبريتية يعني بس اللهم مويا حارة حقت شاهي و زي كدا

هناك فجأة راح دا Yann يسأل شباب كانو واقفين هناك انو ع اساس يعرف فين السورس حق المويا دي
فاستلمو اهلو انو انتا من فين و مسلم و لا مسيحي .. لمن قعد يقلهم مسيحي يقولولو يعني ما تصلي …. ؟؟

فبعدين جيتهم انا و سرت اقلهم انو سلام عليكم و زي كدا

فسالوني ” انتا بعد مسلم و لا مسيحي .. ؟”

قلتلهم لا مسلم قال كيف تمشي مع الكافر دا ؟؟؟ S=

فالله ستر اصلن لانو كان على ارضهم و بين جمهورهم فما ينفع الواحد يتشاكل معاهم من الاساس

بعدها كانت خلاص ادن المغرب و راحت الشمس فيا دوب مسكنا خط الرجعة …

الين وصلنا جدة تقريبن الساعة ١٢ في الليل بعد يوم كان من اروع الايام بالتاريخ ^ـ^

شوفو هنا عشين باقي الصور حقت الرحلة ^_^

http://picasaweb.google.com/6argoo3a/WadiAlLith

لستة زواجات .. ^_^

// مارس 28th, 2009 // 6 Comments » // SLiDE, تصـاوير

.

قبل شهر تقريباً ..

كلمني ( عمار آل محمود ) – و هوا اخ بالنسبالي و يمكن والله أعز ..
لانه من أكتر الناس اللي أحترمهم و أعزهم بطريقة مو طبيعية .. و أتشرف بمعرفتهم كتييييييير الشرف ..

يومتها لمن كلمني طارت وصلة من عقلي من كتر الفرح لمن كان بيخبرني انه ماشاء الله تبارك الله ربي تمم عليه و بيعزمني ع حفلة الملكة حقتو ( كتب الكتاب – عقد قران … الخ )
و طلب مني طلب انو ازا اقدر اجي و اجيب كمرتي عشين اصورلو الحفلة ..

طبعن انا مررره ما صدقت نفسي ساعتها ومررره حسيت انه شرف كبير ليا بالاضافة إلى انها مهمة صعبة بالنسبالي لانو نادراً او امكن دي اول مره اصلن أصور بيها حفل مهم زي كدا = )

طبعن من وقتها و من يومت ما كلمني وانا قعدت ازبط نفسي عشين ما الخبط فداكا اليوم ..
و ما خليت شي يعتب عليا .. ( اكمل قراءة التدوينة )

الحكاية كلها … نور

// فبراير 24th, 2009 // 8 Comments » // SLiDE, تصـاوير

مممم امكن كلام اليوم ناس كتير عارفينو

بس كـ فهم انا فهمتو قريب جداً بشكل نقدر نقول كامل .. = )

حكاية التعريض وما التعريض أو الـ Exposure اللي هوا كل ما نتكلم عن مصور ولا صورة لازم نسمع دي الكلمة ..

P.s
من اول انا اعرف اش يعني اكسبوجر بس انو اش يعني تعريض والله اول ما كنت افهم
الين جاني سيدي و حبيبي باهي مشاط وفهمني انو تعريض يعني تعريض السنسور للنور
وانا كنت احسبها انو تعريض من العرض يعني كدا نمطو بالعرض ولا شي زي كدا ^_^

فالفكرة انو اش يعني تعريض وكيف نقدر نحصل على تعريض مناسب لاي صورة نصورها .. ؟ ( اكمل قراءة التدوينة )

كامرتي عاجبتني = )

// فبراير 16th, 2009 // 9 Comments » // تصـاوير

.

دائمن لمن بنجي نخرج نصوّر مع احد ولا ندخل مواقع التصوير و حقت المصورين .. و نشوف كيف انهم طالعين بصور نتايجها روعة
اول شي بيجي ببالنا انو اححه والله بس لو عندي زي كميرتو .. حتشوفو كيف ..
وبس صبركم عليا شويا اغيّر الكميرا المتنحة اللي عندي و شوفو الصور اللي رح اسويها ..

فـ الين متى رح نقعد نحلم بكاميرا أحسن من كاميرتنا .. ؟

والين متى رح نقعد متضايقين من كميرتنا .. ^_^ .. ؟

مو خلاص .. ؟ نوقف شوية نفكر بالكاميرا الجديدة اللي مي راضية تجي لكتير اسباب و نبدا نقتنع بكاميرتنا اللا دحين .. ؟