او انو اقدر اساهم بشويا بس من اني اوري الناس قد ايش دي الاشياء عظيمة .. و قد ايش لمن الواحد يكون هناك رح يحس بعظمتها و الروحانية اللي موجودة فيها ..!
اللي ما انكر وجودها ولا اي بشر قدر يكون هناك =)

واحد من دي الاماكن هو المسجد النبوي .. مسجد سيدي عليه افضل الصلاة و السلام !
في  كل مره احاول كنت اروح اصور .. اتحنس انو ماني قادر اعمل صورة حلوة افتخر اقول انو والله دي الصورة انا صورتها للمكان الطاهر دا !!
و لو ارجع بالتفاصيل او حتى اي حدن منكم يراجع حسابي في فلكر يمكن كل اللي موجودة فيه شويت صور تنعد ع الاصابع للحرم ..!

فيوم من الايام كلمني واحد من اصدقائي امتن ليه بقية عمري للفرصة اللي عرضها علي ..
اتصلبي وليد يقلي عن مشروع قائم كواحد من مشاريع مجمع الملك فهد لطباعة المصحف الشريف في المدينة المنورة باسم Virtual Reality

واللي كانت فكرتو تصوير الحرم النبوي بطريقة ما سارت قبل كدا ..!
( و برأيي  ماراح تسير ابداً بعد كدا بدي الطريقة =) )

استغرق المشروع فترة قالولي تقريبا اخدت ١٠ سنوات من بدء طرح الفكرة و التخطيط ليها و دراستها و كدا
و لغاية اليوم اللي شرفني بيه رب العالمين و شرف كاميرتي اني اكون معاهم في دا المشروع الاسبوع الماضي تقريباً

المشروع كانت فكرتو انو يتم تصوير الحرم النبوي بالكامل بكل اجزائو و تفاصيلو بطريقة البانوراما ..
و مو اي بانوراما كان التصوير بمعدات رهيبة و على مدى ٥ سنوات تقريباً عشين يصورو الحرم كامل من جوا بطريقة الـ Spherical Panorama  او يعني بطريقة ٣٦٠ درجة

المبدع و الاستاذ و المربي و صاحب الطف اخلاق قابلتها بحياتي ..
الاستاذ علي برناوي ( مدير قسم الحاسب الالي في مجمع الملك فهد )

كان قائد فريق التصوير اللي بيتشغل ع المشروع ..!
ما انسى فضل الاستاذ علي ليا بعد رب العالمين عز و جل ..

من اول يوم اتقابلنا و حكاني عن المشروع حسيت قد ايش عند الانسان دا رسالة من ورا المشروع عظيمة

قد ايش حسسني انو يا رب تكتبني اكون مشارك ولو بشي بسيط بدا الموضوع

قد ايش وراني اخلاص و تفاني و دقة في العمل .. قليل والله انو نشوفها عند اي احد تاني ..

من اول يوم زودني بفيديوهات و كتب تعليمية عن دا النوع من التصوير اللي عن جد قبلها ما كنت اعرف عنو اكتر من كلمتين او تلاتة !!

شاكر و ممتن ليك سيدي علي و يعلم الله انو اتعلمت منك كتييير الكتير ..
الله يجزاك خير !!

اللي صار بعدها انو حددنا اول يوم للتصوير اللي رح اكون بساعدهم فيه ..
بحكم انو الفترة اللي صورو فيها الحرم الداخلي تقريباً انتهت و خلصوا ما شاء الله عليهم كامل تفاصيل الحرم من جوا

اتخيلو بكرت النهار ان شاء الله لمن ينتهي المشروع دا و يطلع ما رح تتخيلو قد ايش رائع
و قد ايش حتكون اول مره لكتييييير مننا ( و انا اولكم برغم اني ع اساس عشت طول عمري كامل في المدينة )

لمن حيسير لينا امكانية نتمشى افتراضياً جوت الحرم النبوي

نوقف قدام الحجرة الشريفة … و نقرب ونشوف ادق التفاصيل اللي ع الباب
او اش مكتوب في السقف ..
او حتى لمن نوقف في الروضة الشريفة برضو ..
و نطول هنااك براحتنا !
و نروح للمحراب .. و مكان ما يصلي الرسول عليه الصلاة و السلام !
ولا لمن نروح الدكات
او عند باب السلام
او … او … او …

يعني كل التفاصيل اللي ياما و ياما عدينا جمبها بسرعة
او احيان كتير اصلن ما جاتنا الفرصة نروحها او نشوفها بتأمل كدا !!

رح تكون كلها على DVD ان شاء الله
يخلينا نشوف كل دي الاشياء بتفصيل التفصيل كمان =)

المهم …

انو بحكم انو التصوير الداخلي انتهى من فترة
و الان قربت تنتهي كمان توسعة خادم الحرمين الشريفين الملك عبد الله .. جزاه الله عنا و عن المسلمين كل الخير و الجزاء
كان دوري انو اساعد معاهم في تصوير دي التوسعة و اضافتها للمشروع ..!
بالإضافة لتصوير لقطات ثابتة للحرم من زوايا تانية !!

دا من اكبر و اهم الاحلام اللي كنت بسعالها في حياتي .. و الحمدلله الحمدلله الحمدلله قدرت اوقف وسط دا الحلم و اكون فيه

ويا رب يا رب يتقبل ربي سبحانه و تعالى دا الشي اللي قدمته يا رب =)

اول مره كنا هناك يوم الجمعة .. في وقت الصلاة .. صلاة الجمعة

كان الهدف من اللقطة دي اننا نصور حجم التوسعة الجارية و نبين الناس وهما محتويتهم التوسعة الجديدة ..

بعدها بفترة برضو كان المقرر اننا نطلع على سطح احد الفنادق القريبة من الحرم و ناخد لقطات كمان تانية للحرم بشكل عام و واسع لكامل الحرم !

اليوم الاخير كان الحلم ..

لمن طلعنا من فجر اليوم لسطح الحرم النبوي !
كان المقرر اننا نصور من المنارات ومن السطح باقي التغطية للحرم !

لاول مره فحياتي بديت احس انو انا فين ،،، !

طيب ليش انا .. ؟

اول خطوة خطيتها على سطح الحرم كان عن طريق وحدة من المنارات .. و بالتحديد التحديد المنارة الغربية الجنوبية !

اول احساس جاني هناك انو كتييير جو المدينة من كل مكان و فكل زمان تقريباً
بس هل الكل قدرو يشوفو المكان الطاهر العظيم دي زي ما انا بشوفو دحين ؟؟

طيب هل رح اقدر انقل دي الصورة زي ماهوا مطلوب مني ..؟

اللي انا متاكد منو تماماً انو مستحيييل الاحساس يوصل مهما كان و مهما حيكون بنفس الاحساس لمن يكون الواحد هناك

طبعا للعارف بالحرم حيعرف انو دي المنارة بعيدة شويا عن القبة الخضرا اللي هيا روح المكان

وتحتها تماماً قبر سيدي الرسول و حبيبي محمد عليه و على اله افضل الصلاة و اتم التسليم !!

بدينا التصوير لكل شي تقريباً

لكل جزء بيوري اي احساس تجاه هادا المكان !

وكل ما كنت بقرب للقبة كل ما كانت رجولي بتعجز تشيلني فديكا اللحظات !

الييين وصلنا تماما مقابل القبة الخضرا !

العظيم في الموضوع الاحساس .. الف مره بتكلم عن دا الاحساس بحاول اني بس اوصلكم كيف ممكن يكون .. وبعجز

المستحيل بعينو انو الواحد يقدر يعرف اش نوع الاحساس اللي يكون هناك =)

هل هو حب للمكان وساكن المكان عليه الصلاة و السلام ؟

ولا هو شوق ؟ ولا هو خوف ؟ ولا حزن ولا فرح ولا زعل ولا رهبة ولا ولا ولا ولا ….

قررت عن نفسي بعد ما عجزت نفسي و روحي عن وصفه انه دا الاحساس من نوع الاحاسيس الخاصة بالمكان

يعني مستحيل ينوصف او نشبهو او نقربو لاي احساس تاني عشناه في اي يوم من حياتنا = )

الرجفة .. الخوف .. الدموع و انا بحاول اصور المكان قد ما اقدر عشين مستحيل اعرف ايت زاوية و لا ايت مكان هوا اللي حيوصل فهمنا للمكان للناس اللي رح تشوف الصور بعدين خلاني اتوه تماماً

و نفس الاسألة دائماً .. انو يا رب ليك الحمد و الشكر انو خليتني اكون بدا المكان ..
فيا رب دلني اعمل الصح هنا و اقدر اؤدي المهمة دي بشكل صح !

انو يا رب في الاف الالاف من المصورين اللي احسن مني بمليون مره .. و يقدرو يوصلو عظمة دا المكان احسن مني بمراحل !

فيارب بس كون معايا =)

كنت اتمنى انو الوقت ما يخلص هناك ..
انو توقف الدنيا ساعات و ساعات و ايام عشين بس اقدر اعيش اللحظة دي عمري و عمري و عمر تاني فوقو !

بس كان لا بد من انو ننزل في النهاية

انو يكون درس حياة و علم و تاريخ و ذكرى تستمر اتوقع لنهاية حياتنا الدنيا دي … نفتكر و نديم الصلاة على خير الخلق قاطبة .. من سكن طيبة .. و من سكن الحرم النبوي و من كان قبره عليه الصلاة و السلام اقرب ليا من اي وقت مضى و اي وقت جاي =)

حتى مع دي الكلمات اللي كتبتها … انا عارف و متيقن انو مارح تكون بحجم الذكرى اللي تركها المكان فيا ..
ولا بعظمة الاحساس اللي كان فيني داكا اليوم .. =)

مررره و انا هناك كانت تحضرني قصيدة الدكتور وافي الحاج ماجد

لمن يقول

فمحاسِنُ الأخلاقِ إنْ حُشِدَتْ فَلَيْسَتْ غَيْرَ سَطْرٍ في كتاب محمّدِ
وعرائِسُ الأَزْهارِ إِنْ نَفَحَتْ فَلَيْسَتْ غيرَ عِطْرٍ مِنْ عَبيرِ محمّدِ
ومناقِبُ الساداتِ إنْ سَطَعَتْ فَلَيْسَتْ غيرَ نجمٍ في سَمَاءِ محمّدِ
وروائِعُ الأشعارِ إنْ وَصَفَتْ تَنَاهى الحُسْنُ فيها مِن جمالِ محمّدِ
وبلابلُ الأطيارِ إنْ صَدَحَتْ ففي معنىً يفيض محبّةً لمحمّدِ
ومدائحُ البُلَغاءِ إِنْ تُلِيَتْ فما هيَ كُفءُ حَرْفٍ من حروفِ محمّدِ
فإذا مدحتُ محمّدًا بقصيدتي فلقد مدحت قصيدتي بمحمّدِ

ان شاء الله تعالى رح يشوف الـ DVD دا النور قريباً جداً

ومن كرم الله عز و جل ان المقرر يكون بيتوزع مجاناً عن طريق مجمع الملك فهد الله يجزاهم خير جميعاً

كل مين ساعد و كل مين كتب و كل مين اشتغل او فكر بدا المشروع الهي ربي يكتبلهم الخير و الاجر لعظمة دا المشروع …

Like

Unlike

فكرة المقال عن انو كيف ممكن نخلي التويتر مكان يطورنا من ناحية التصوير اكتر .. !!

إزا لسا منك في Twitter فممكن انك تحسبو اساسن مكان عشان الناس تجي تكتب اش اتعشو امس .. ؟ولا من فين رايحين يشترو بكلة الشعر حقتهم .. ؟
ودا شي ساير هناك بس انو مع كدا هو فرصة و مكان مررره ممتاز عشان تقدر تطور من نفسك بيلو ..!!

كيف كدا ؟

انا مثلا من الناس اللي تحب التصوير .. و خاصة حكاية تصوير البورتريه ..
فبكل بساطة رح اتابع كل الناس اللي مهتمين بالتصوير و بتصوير البورتريه هناك من لمن اعمل سيرش عليهم = )

فبالتالي دي خمس اشياء ع الاقل رح تخلي Twitter يطور ادائك في التصوير .. !!

١- دوّرو على مصورين جداد ..
بمجرد ما انو نعمل Follow للمصورين دول فاحنا ارتبطنا بيهم من ناحية انو سرنا نقرا اخبارهم اول باول ..
نتكلم معاهم .. نرسلهم ملاحظاتنا .. كتير منهم رح يكونو مبسوطين بانهم يردو علينا و يساعدونا ..

٢- اخبار جديدة اول باول ..
برضو اغلبية المصورين الكبارية اللي بنتابعهم هناك
رح يضلوا يعملو ابديت بالاخبار الجديدة في التصوير و اش اخر تكنيك عملوه ولا اش اخر الحاجات الجديدة في السوق ..

٣- خدو رأي الناس بصوركم ..
لمن يكون سار عندنا عدد من الناس اللي بتتابعنا من المصورين هناك .. رح يسير سهل علينا انو نعرض صورنا الجديدة عليهم عشان ناخد رايهم و نحسن ادائنا
بس حط لنك لصورتك الجديدة و اسال الناس اللي بتتابعك عن رايهم بيها ( او ممكن نعملها بطريقة محددة اكتر انو نحط اللنك و نسالهم انو مممم دي الصورة مو كانها اوفراسكبوزد ؟ )

٤- اسألو و خدو اجوبة ..
الحلو في الموضوع انو تاخد اجوبة مباشرة على اي سؤال ممكن تحطو عن التصوير ( يعتمد بدرجة كبيرة ع عدد الناس اللي بتتابعك )
ودي حلاوتها انو بتاخد اجوبه واضحة و على طول = )

٥- تويتر يعلمنا نكون مختصرين ..
بما انو التويتر ما يمديك تكتب اكتر من ١٤٠ حرف فيلو .. فدي حاجة كويسة عشان نكون مختصرين و محددين احنا اش نبغى بالزبط
سواء باسألتنا او بإجوبتنا ع الناس .. كدا نكون قدمنا الشي المباشر اللي احنا نبغاه و سمعنا تمامن الشي اللي نبغى نسمعو ^_^

كيف نستفيد من تويتر باكتر حاجة ممكنة : هوا انو ندي اكتر من ما ناخد = )

لانو تويتر مو بس عشان نقرا افكار الناس و لا نشوف اخبارهم و نجي ماشيين .. لا
الحكاية انو ماحد رح يعبرنا ازا ماكنا نشيطين هناك .. نحاول نساعد الناس اللي بيتابعونا و نتابعهم ازا احتاجوا شي احنا نعرفو
عشان في الوقت اللي نعرض فيه شي ع تويتر يكونو جاهزين يسمعو مننا ^_^

وكيف نبدا بدا الـ Twitter .. ؟

اوكي ..

اول شي .. خلينا نسجل اكاونت جديد في www.twitter.com

تاني شي .. دورو على الاشياء المختصة بالتصوير عشان نتابعها .. ( هادي شوية اكاونتات لناس عشان نستفيد منهم : Scott Kelby / Steve Brardi / @artwolfe / @chasejarvis / @jeremycowart / @neilcreek / @jimgoldstein / @ricksammon / @scottbourne / @zarias / @strobist/ JunkieeNet )

تالت شي .. نبدا ننطلق في تويتر .. نتشارك المواقع الكويسة .. نرد ع الناس .. نحط صورنا اللي اخدناها …. و زي كدا ^_^

اتمنى نشوفكم هناك قريب = )

Like

Unlike

فيوم من الايامات اتعرفت ع دا الانسان اللا اسمو Yann .. 
شب جدن محترم من دولة شقيقة نوعن ما p=

المهم دا الانسان كنت فاندلسية داكا اليوم و قاعد اشتغل على وحدة من التصاوير اللي مصورها اول عشين اسلمها للناس .. و بس يجيني فجأة ويفتح سيرة انو هوا مصوراتي كمان و يحب حكاية التصوير .. 

وانو دا الانسان طلع عندو عادة غريبة ولا هواية هيا ما ادري والله 
انو كل اسبوع يركب الجيب اللي معاه و يروح يسستكشف اماكن في السعودية ..

قعد يحكيني ع الاماكن اللي راحها و كدا و يوريني صور انا من جد ساعتها انهبلت .. انوو احححه من جد في شي زي كدا هنا ؟؟

بعدها بكمن يوم اتصلبي و رحتلو عشين نرتب لدي الطلعة الخرافية كانت نوعن ما ..

كان المخطط انو من صبحية ربنا كدا ع الساعة 05:30 نتقابل عند هارلي ديفيدسون اللي في الاندلس  ..
ومن هناك رح نتحرك .. ^_^

طبعن بحكم انو انا زيهم تمامن مواعيدي بالميلي .. فيوم الجمعة 3 – ابريل الساعة 06:00 كنت هناك و كان بيستنانا الشب التالت معانا فدي الرحلة Roman

( اتنينهم شغالين في القنصلية الفرنسية بس انا عرفت كل واحد فيهم لحال p= )

Yann the Driver

طبعن كل اللي كان معانا موية و الكاميرا حقتي و حقتو و بنزين و مدري ايش كمان و شوية سناكس ع الطريق ..
تعليمات اخينا يان انو كان ما ينفع نشيل معانا اكل ( كبسة مسلن ) هوا يا دوب سندوتشات اخدتها من ميد يومتها ^_^

بعد بساعتين و نص تقريباً او اكتر شوية وصلنا لحد الطايف .. لانو ما كان يمدينا نخش مكة فلفينا من عند طريق الناس التانيين

و المكان اللي كنا رايحينو يعني تحت الطايف في الجنوب ابو 200 كيلو تانية .. 
ع اساس يكون مفرق الطريق اللي رح نوصلو .. بنكون ساعتها على ارتفاع 2500 متر تقريباً داك المكان اسمو قرى بني سعد
ومن هداك المفرق رح نبدا ننزل نزول للوادي ( وادي الليث ) الين نوصل لاخر شي عند الليث ومنها نرجع على جدة ..

( مكان المفرق )

اول ما وصلنا قريب المفرق دا كانت الساعة تقريبن 9 و نص ..  تشوفو كيف الغيوم مرره كانت بالاكبر حاجة و قريييبة بالاقوى شي .. فكملنا طلوع شويا بعد المفرق عشين نوصل للحكاية دي ^_^

Brrrrr

بعدها بدينا نكمل نزول عشين نوصل للوادي ..
بعد اول 100 متر تقريبن و قفنا عشين ناخد فطورنا .. عن نفسي توست جبنة و هما كانوا جايبين تفاح و موز و مدري ايش << اش يحسوا فيه الناس لما يفطروا زي كدا ؟؟ p=

هنا يبان الطريق اللي بنمشي فيه الين الوادي تحت هنا الارتفاع كان حوالي 2000 متر و شويا

طبعن الطريق كان مرره خطير و ان كان عليا فكنت جداً مبسوط بصراحة ..
كان يدوب السيارة تمشي لحالها بسبب انو الطريق ضيق و كلو حجار و رملة و زي كدا .. و دا الانسان اللي اسمو يان بصراحة سوييق .. اتوقع انو يرجع اصلو من هنا من عندنا عتيبي ولا حارثي ولا شي زي كدا p=

ع الساعة 11 تقريبن كنا وصلنا لقرية فنص الجبل ..

طبعن جناااان مووت دا المكان ..
وانفلت اصور صراحة فدا المكان .. الين جونا اتنين طلعوا ساكنين جوت القرية ..
حلفو بالمية يمين انو الا نتفضل نشرب الشاي ..

يان و من ورا ابو خالد و طوير ^_^

وهنا قعدوا يحكونا حكاية القرية دي .. دول الاتنين الشيبة اسمو ابو خالد .. و التاني الشباب اسمو طوير ..
قالولنا انو دا المكان اللي احنا وصلنالو يسموه ( فرعة ابن الحارث ) .. وكانت عبارة عن قرى كتير قريبة من بعض لمن الوادي و دي القرية هيا اكبرهم

دا طوير يكون ابن شيخ القبيلة .. و الشيخ ابو خالد عمرو دحين قريب الـ 70 ولا 80 سنة

فبيقلنا انو دي القرية يعرفوا تاريخها بالتواتر .. يعني كل مين يسمع من ابوه ولا جدو و يحكي اللي بعدو .. فهوا يقول انو لغاية تقريبا ثامن جد ليهم يقول انو مو هوا اللي بنى دي القرية اللي قبلو بنوها ..
يعني بالتقدير كدا عمر دي القرية يزيد عن 700 سنة ..
كانو اهل القرية ساكنين فيها الين قريب يعني سابوها من حوالي 20 – 25 سنة .. وكل صيف تقريباً او كل فترة بيجوها اهلها بيزوروها و يقعدو فيها و الين دحين بيوتهم موجودة ..
حتى ابو خالد قعد يحكينا انو دا بيت فلان و دا بيت مدري مين و زي كدا ^_^
ابو خالد و طوير يقولو انو تقريباُ هما الوحيدين اللي مداومين على دي القرية يعني كل اسبوع عشرة ايام يجوها يقعدو فيها ..

حتى انو آخر 500 متر تقريباً من الطريق اللي يوصل للقرية يقولو انو الجرافة حقت الحكومة ما قدرت توصل عشين تفتح الطريق فوقفت قبل القرية بـ 500 متر و اللي كمل الطريق هما دول الاتنين قعدو يشتغلو عليها باليدين واخدت معاهم شغل سنة تقريبا ^_^

طبعاً دا الكلام كلو سار واحنا بنشرب شاي معاهم من اروع الشايات اللي في الدنيا ..
مع انو ماني من شريبة الشاي بس داكا كان لو طعم خرافي ( شكلهم دافين شي كانو p= ) .. السؤال كان انو كيف كانوا عايشين اهل القرية .. ؟

فاللي قالوه انهم كانوا دايمن يزرعو بر و شعير و يعيشو اغلب حياتهم عليها بالاضافة لشوية ناس منهم يرعو غنم في الجبل و زي كدا ..
بالطرف التاني من القرية كان في منحلة برضو من عمر القرية كمان .. و يقولوا انهم كانوا برضو يستفيدوا من دا العسل الين قريب دحين سار خفيف يطلع ..
و الموية كانت من نبعة فوسط الجبل بيسحبو الموية منها عن طريق مواسير ممددينها ..

هنا طبعن كان اهم شي انو نروح لدي النبعة لانو كانت فرصة حلوة ^_^

ouch *_*

كدا كنا بنلحق الماسورة عشين نوصل للنبعة فوسط الجبل

انا شربت من هنا بس التنحين اللي معايا ما رضيو قال يقرفو

الين وصلنا هناك وكانت من جد شي رهيييب انو موية من وسط الجبل بتخرج و باردة زي التلج و من جد طعمها شي ما ينوصف ^_^

بعد ماشفنا النبعة رجعنا للقرية عشين نشوف البيوت

كلها كدا مبنية و مكونة من الحجر

و الحصن دا حقهم اللي فنص القرية اللي كان مبني عشين يتحمو فيه لمن يسير حرب ولا احد يهجم ع القرية

ابو خالد يقول انو ما عمرو سارتلهم حرب الحمدلله بس دي عمرها اكتر من 700 سنة

و هنا كانت المناحل حقتهم

هادي اللي من جد كيف اتبنت .. سبحان الله

و من هنا يبان الطريق اللي يوصل للقرية و كيف اللي اشتغلوه بيدهم

و هادا السور اللي في نص الجبل تكون المقبرة حقت اهل القرية من يوم ما ربي خلق القرية يقولو ^_^
( الله يرحمهم و يغفرلهم و يعافيهم و يعفو عنهم )

السور و من عند الغامق اللي فوق تقريبن يبدا الطريق اللي باليد

جلسة الشاهي المعتبرة p=

بعدها كان ابو خالد و طوير و واحد تاني جا من اهل القرية و كانو مسوينلنا عيش حب من حق القرية و عدس برضو زارعينو في القرية .. اكلنا معاهم لقمتين من جد ما تتنسي و بعدين انو سار لازم نمشي عشين نكمل طريقنا للوادي = )

هادي الحجرات رهيبين كانهم ادمي ( هنا وقفنا اتغدينا ^_^ )

ع الساعة 2 و نص تقريبن كنا وصلنا لبداية الوادي .. وادي الليث
وهنا وقفنا عشين نتغدا ع اساس = )

طبعن في الوادي دا كان من احلى الاشياء اللي ممكن الواحد يمشي فيها بحياتو بسبب انو الجو و طبيعة المكان اللي بتتغير كل شويا من غيم لبرد لنباتات و انواع حيوانات و طيور غريبة = )

من الحيوانات اللي شفتها هناك كان في جمال طبعن و حمير و خراويف .. وكان في وحدة من الاماكن في نمر عربي بس كان براس الجبل بعيييد و هنا ساعتها الواحد بدي يخاف p=

يا مطره صبي صبي

طبعن اغلب الطيور و الحيوانات بديت تطلع بعد ما بديت تصب مطرة رااايقة و وشويا سارت مطرة مطرة

ساعتها كانت صح الحيوانات و الطيور بتجي من كزا مكان بتتجمع عند الموية عشين تشرب بس بنفس الوقت كانت مشكلة بالنسبة لينا عشين حكاية لا نعلق بالسيارة فوقتها سرنا نسرع بالمشي وما طولنا كتير

دا طير اسمو الـ Egret

كملنا الطريق اللي كلو كان حجار و صخور و بصراحة كان متعب مررة بس طول ما الواحد ماشي مستمع سبحان الله

المسافة حقت الوادي ( طولو يعني ) كان حوالي المفروض 80 كيلو متر لكنو اخد وقت ما يقارب الـ اربع ساعات او اكتر شويا ..

وصلنا لنهاية الوادي حوالي الساعة 6 كدا  وكان هنا بداية طريق الاسفلت اللي بيودي لليث ..

منبع العيون الحارة

في الطريق و ع حسب الخطة كان المفروض نوصل لمكان اسمو نبع العيون الحارة

هادي عبارة عن موية حارة بتخرج من وسط الأرض بس ماهي كبريتية يعني بس اللهم مويا حارة حقت شاهي و زي كدا

هناك فجأة راح دا Yann يسأل شباب كانو واقفين هناك انو ع اساس يعرف فين السورس حق المويا دي
فاستلمو اهلو انو انتا من فين و مسلم و لا مسيحي .. لمن قعد يقلهم مسيحي يقولولو يعني ما تصلي …. ؟؟

فبعدين جيتهم انا و سرت اقلهم انو سلام عليكم و زي كدا

فسالوني ” انتا بعد مسلم و لا مسيحي .. ؟”

قلتلهم لا مسلم قال كيف تمشي مع الكافر دا ؟؟؟ S=

فالله ستر اصلن لانو كان على ارضهم و بين جمهورهم فما ينفع الواحد يتشاكل معاهم من الاساس

بعدها كانت خلاص ادن المغرب و راحت الشمس فيا دوب مسكنا خط الرجعة …

الين وصلنا جدة تقريبن الساعة ١٢ في الليل بعد يوم كان من اروع الايام بالتاريخ ^ـ^

شوفو هنا عشين باقي الصور حقت الرحلة ^_^ 

http://picasaweb.google.com/6argoo3a/WadiAlLith

Like

Unlike

.

.

.

قبل شهر تقريباً ..

كلمني ( عمار آل محمود ) – و هوا اخ بالنسبالي و يمكن والله أعز .. 
لانه من أكتر الناس اللي أحترمهم و أعزهم بطريقة مو طبيعية .. و أتشرف بمعرفتهم كتييييييير الشرف ..

يومتها لمن كلمني طارت وصلة من عقلي من كتر الفرح لمن كان بيخبرني انه ماشاء الله تبارك الله ربي تمم عليه و بيعزمني ع حفلة الملكة حقتو ( كتب الكتاب – عقد قران … الخ ) 
و طلب مني طلب انو ازا اقدر اجي و اجيب كمرتي عشين اصورلو الحفلة .. 

طبعن انا مررره ما صدقت نفسي ساعتها ومررره حسيت انه شرف كبير ليا بالاضافة إلى انها مهمة صعبة بالنسبالي لانو نادراً او امكن دي اول مره اصلن أصور بيها حفل مهم زي كدا = )

 طبعن من وقتها و من يومت ما كلمني وانا قعدت ازبط نفسي عشين ما الخبط فداكا اليوم .. 
و ما خليت شي يعتب عليا ..

xoxo

طبعن كأول فكرة كانت إني رجعت لكتاب Scott Kelby الاخراني اللي هوا (  The Digital Photography Book : Vol.2 )
واللي فيلو شابتر كامل عن دا الموضوع … .

طبعن استفدت منو بشكل اساسي الشي الكتير ^_^

بس كان بيقول نقطة انو .. ” فزي كدا حالات للتصوير و اللي هيا عادتن بتكون اغلب لحظاتها سواني .. فالافضل اننا نجهز لستة بالصور اللي نبا نصورها عشين نوفر الوقت هناك .. “

وطبعن هوا قال انو في لستات جاهزة موجودة ع النت خاصة بتصوير الزواجات بشكل خاص ..

ouch *_*

فانا بس قلت هيا دي و قعدت ادعبس في النت لمن طلعت عيوني وانا بشوف لستات مررره رهيبة و حلوة .. و فعلن كلها مفيدة

حتى لقيت دي اللستة .. اللي هيا ..

A List of 50 must have wedding photos

يعني باللهي اش اخطر من كدا .. ؟ 

50 فكرة لـ 50 صورة اتوقع انها كانت تكون كافية بالنسبة لاي واحد رايح يصور …
بس للاسف .. لمن اخدت فكرة عن الموضوع  لقيت انو تلات ارباع دي اللستة ما ينفع فحفلاتنا احنا و زي كدا ^_^
خصوصي حكاية رقم ( 23 ) ما نهضمت معايا p= 

طبعن داكا اليوم ان شاء الله اني اكون عملت شي كويس … 

بس المهم اللي وصلتلو انو لازم ازبطلي لستة تفيدني و تفيد اي احد ينحط فموقف و حابب يطلع بصور حلوة فحفلة زواج ولا ملكة ولا شي زي كدا 

الفكرة انو ما نبغى نقدم صور بصراحة كدا من زي حقت اللي في ليالينا و لا اللي نص مشاغل الافراح بيسووها لانو بصراحة ياما شفت و ياما حسيت انها ناقصة و بدها فكرة الابداع شوية كمن تكّه .. 

و بنفس الوقت نبغى نوصل للستة تناسب جو حفلاتنا بعاداتنا و تقاليدنا = ) 

فكل مين يمر من هنا يجي يحط افكار لصور ممكن اننا نتعلم منها او يتعلم من اللي محطوط ويسير اقعد اعمل ابديت لدا الموضوع قد ما اقدر و نزبطو ونحطو فبلوق جديد يستفيد منو اي حدن حابب انو يصور زي كدا 

UPDATE

مررره احب اشكر اخويا محمود اكرم اللي ماشاء الله عليه بدي يزبط الامور تمام ميه ميه ..
واتحفنا بشوية افكار يوم تصوير الزواجات منها ..
طبعا كملاحظة انو مرره نفسي نطلع شويا عن الصور التقليدية العادية …
فخلينا كمان نحاول نطلع افكار لصور مجهزة مسبقاً مع الاتفاق مع العريس ..
كمان بنفس الوقت صور لو كانت بنت بتصور فحفلة الحريم او بتصور العروسة ..

فدي بداية اللستة ^_^ 

صور خاصة بتجهيزات الحفلة ^_^

عربية الملكة
علبة الملكة
سيارة العريس واقفه
سيارة العريس لمن يوصل
بورتريهات للحضور
الفرقة اللي جات  
الاتاريك و المعاشر و دي الحبشتكات  

و صور خاصة بالأهل

العريس مع اخوانه 
العريس مع ابوه أو اخوه الكبير 
العريس مع ابو العروسه او …. العروسه ….(:
العريس مع اخوان العروسه واقاربها
العريس مع جدو وسيدو

صور في نص الحفل 

العريس مع المعازيم
العريس وقت الرقص
لأهل العريس وقت الرقص
مثلا ( لو رقص العريس مع الوالد او احد الاخوان او ابو العروسه …..الخ )

صور للملكة ( عقد القران ) ..

المملك وهو يكتب العقد
العريس وهو يوقع عقد القرآن
أبو العروسه وهو يوقع العقد

تمام كدا ^_^ .. ؟

.

.

Like

Unlike

بس كـ فهم انا فهمتو قريب جداً بشكل نقدر نقول كامل .. = )

حكاية التعريض وما التعريض أو الـ Exposure اللي هوا كل ما نتكلم عن مصور ولا صورة لازم نسمع دي الكلمة ..

P.s
من اول انا اعرف اش يعني اكسبوجر بس انو اش يعني تعريض والله اول ما كنت افهم
الين جاني سيدي و حبيبي باهي مشاط وفهمني انو تعريض يعني تعريض السنسور للنور
وانا كنت احسبها انو تعريض من العرض يعني كدا نمطو بالعرض ولا شي زي كدا ^_^

فالفكرة انو اش يعني تعريض وكيف نقدر نحصل على تعريض مناسب لاي صورة نصورها .. ؟

طيب في البداية التعريض زي ما قلي باهي وقلتلكم انو هوا فترة تعريض السنسور ( الفلم زمان ) للضوء ..
وبناءً على عدة عوامل بتزيد نسبة التعريض او بتنقص ..

اش هيا دي العوامل .. ؟

بكل بساطة هيا تلات عوامل بتعمل التعريض .. اللي هيا

تلات عوامل اللي هيا ..

1. ISO .. و اللي هوا درجة حساسية السنسور للضوء ..
2. Shutter Speed .. سرعة الغالق .. واللي هوا المدة اللي رح تبقة العدسة مفتوحة فيها وبتسمح للنور انو يدخل
3. Aperture .. فتحة العدسة .. واللي هوا مقاس فتحة العدسة اللي بتحدد كمية النور الداخل للسنسور ,,

فبدي التلات عوامل احنا بنطلع صورة تعريضها مزبوط ..

نتخيلها كيف .. ؟

By : Chris

نتخيل الكاميرا كانها شباك .. 
وليها ضرفات تفك و تنقفل .. ( اللي هيا الشتر – الغالق )

و انو مقاس الشباك هوا زي فتحة العدسة عندنا ..

وانك انتا واقف جوا الغرفة ومررره ضلمة جوا و لابس نضارة شمسية ( اللي هيا الآيزو ) <<كانو تخلف ضلمة ونضارة شمسية p=

فدحين في عدة طرق عشان تقدر تتحكم بالنور جوت دي الغرفة ..

فيا اما انك تسير تفتح الضرفات و تقفلها بشكل بطئ عشين يدخل نور زيادة او بشكل سريع عشين يدخل نور اقل

او انك تكبر مقاس الطاقة عشين يدخل نور كتير او تصغرها عشان يدخل نور اقل 

و النضارة في الاخير يا اما انك تلبس وحدة اغمق عشين يقل النور او تشيلها عشين يكتر النور 

فبكدا ..

سرعة فتحك و تقفيلك للطاقة رح يكون زي الشتر سبيد في كاميرتك

و مقاس الطاقة و كبرها ولا صغرها رح تكون زي مقاس فتحة العدسة عندك

والنضارة رح تكون زي الايزو لما تكون لابسها رح ايزو قليل ولما تشيلها رح يكون الايزو عالي عشين عينك تتحسس النور ..

فبدا المثلث احنا فهمنا كيف نزود او ننقص النور في صورتنا اللي نبغى نصورها ..
لكن في احيان كتير رح ننحكم بمقاسات معينة سواء للايزو او الشتر سبيد او فتحة العدسة .. لانو كدا بشكل سريع :
- لما تكبر فتحة العدسة رح يقل عمق الميدان ويسير جزء من الصورة بس في الفوكس و الباقي برا الفوكس ..
- العكس بالعكس لما نصغر فتحة العدسة رح يكتر عمق الميدان ورح تسير الصورة حادة اكتر  ..
هنا رح ننحكم بفتحة عدسة ثابتة ما نقدر نغيرها .. ^_^ 

- لما يكون في جسم سريع و محتاجين نجمد حركتو رح نحتاج شتر سبيد عالي ..
هنا رح ننحكم بشتر سبيد عالي غالباً ما نقدر نقللو .. ^_^ 

- ولما نرفع الآيزو فوق الـ 400 باغلب الكاميرات رح يعطينا تشويش في الصورة ..

وزي كدا امثلة كتير ..

انتو فكروا فيها منطقيا في كل حالة من الحالات اللي انا قلتها ..
وشوفو اش رح يكون الحل لو انحكمنا بتثبيت واحد من دول التلاتة بمقاس معين .. كيف رح نوازن النور حقنا .. ؟؟

عشين نوازن النور في الصورة لازم يكون مقياس النور في الناضور حق الكاميرا جاي على الصفر

اوكي كدا … ؟ ^_^

Like

Unlike

.

.

دائمن لمن بنجي نخرج نصوّر مع احد ولا ندخل مواقع التصوير و حقت المصورين .. و نشوف كيف انهم طالعين بصور نتايجها روعة 
اول شي بيجي ببالنا انو اححه والله بس لو عندي زي كميرتو .. حتشوفو كيف ..
وبس صبركم عليا شويا اغيّر الكميرا المتنحة اللي عندي و شوفو الصور اللي رح اسويها ..

فـ الين متى رح نقعد نحلم بكاميرا أحسن من كاميرتنا .. ؟

والين متى رح نقعد متضايقين من كميرتنا .. ^_^ .. ؟

 مو خلاص .. ؟ نوقف شوية نفكر بالكاميرا الجديدة اللي مي راضية تجي لكتير اسباب و نبدا نقتنع بكاميرتنا اللا دحين .. ؟

كل كاميرا مهما كانت بالنسبالكم ( أبو كلب ) فيها تقريباً نفس امكانيات التحكم بالضوء اللي موجودة بأي كاميرا تانية في العالم 

بس انو الفرق الوحيد بين الصورة اللي ماشي حالها و الصورة الخرافية هوا المصور نفسو ..

فخلينا نزبط امورنا عشين نعمل صور تستاهل اننا نقول دي حقتنا عن طريق الخطوات اللي رح اقولها ..

( دي الصورة اتاخدت بكاميرا 2 ميغا بيكسل من Canon Powershot A60 )

1. اول حاجة .. اقروا المانول حق الكاميرا حقتكم .. وإزا مررره كنتوا مهتمين بالكاميرا و ضيعتوه .. فدورو عليه فنفس موقع الشركة حقت الكاميرا  لانو اكيد رح يكون موجود اونلاين .. اقرو عن كل الميزات و الخصائص اللي موجودة بكاميراتكم .. رح تختلف معاكم النتايج 180 درجة صدقوني لما تعرفو تستخدمو الميزات دي بدقة ..

2. خدو كميرتكم معاكم لاي مكان تروحوه .. صوروا كل حاجة .. دورو ع الشي اللي شكلو كدا مو قد كدا و لاقو الطريقة اللي تصوروه بيها ويطلع يستاهل 

3. جربو الوضع اليدوي ( المانول ) .. كل كاميرا تقريبا فيها دا الشي .. اتعلمو عليه لانه بيخليكم تتحكمو بالكاميرا بشكل اكبر ..
صورو الصورة باعدادت معينة انتو حطيتوها بالمانول .. غيرو الاعدادات شوية وارجعو صورو صورة تانية .. و زي كدا = )

4. صورو قد ما تقدرو .. خصوصن انو من ازبط الاشياء في كاميرات الديجيتل انها بتخليكم تصورو الشغلانة قد ما تبغو بدون ما تقعدو تقولو رح يخلص الفلم ولا مدري اش هوا ..
صورو المنظر اللي قدامكم اكتر شي تحسو انكم طلعتو بيه .. وقفو التصوير .. ارجعو صورو منظر تاني كمان قد ما تقدرو خدولو صور ..

5. نقو أحلى صورة طلعتو بيها .. و شيلوها بعيد عن الباقيين و خلاص هيا دي صورتكم .. أغلب المصورين الكبارية بيكونو اخدو اكتر من مية صورة يمكن للمنظر الواحد بعدين ينقو احلى وحدة ويعطوها للزبون .. انتو خلوكم زباين نفسكم .. و شيلو احسن صوركم و احتفظو بيها 

وضحت الحكاية انها مو حكاية كاميرا و بس .. ؟

يلا ورونا .. = )

Like

Unlike

قرر يحن علينا احنا المواجيد فجدة ..
وانو يعملنا دورة تعليمية عن أساسيات التصوير ..!!

فانا مرررره متحمس لدا الموضوع ..

ومرره ان شاء الله نفسي اكون فيه

تفاصيل الدورة ..

 وهنا في لنك عشين اللي ما يعرف مين باهي مشاط زي الناس … .

http://www.flickr.com/photos/bahimashat/

الله يوفقك يا سيدي باهي = )

Like

Unlike

ONE LiFE, originally uploaded by S a l e e m – H o m s i.

… That we LiVE ]

Like

Unlike

So WE SiDE – Part IV, originally uploaded by S a l e e m – H o m s i.

Like

Unlike

نحتاج عادةً لغفوة ..

لـ عام .. ؟

عمر .. ؟

أو أكثر !!

انتِ انا …. .

Like

Unlike