6argoo3a » اللي شفتو …]

اش يعني آثار ؟؟

Bn 6argoo3a — Mon, 19 Oct 2009 02:11:38 +0000

من اغرب الغريب اني خلقت في اطهر مكان في الارض و احبها إلى الله عز و جل و سكنت فيها لاكتر من ٢٣ سنة
و لغاية قبل ٤ سنين بس كانت اول مره ليا فحياتي اسمع و اشوف اثار في المدينة المنورة غير اللي حفظناها لدرجة ايقنا تماماً ان اي شي غير مسجد سيدي الرسول عليه الصلاة و السلام و مسجد قباء و القبلتين ولا شهداء احد يعتبر اساسا شي خرافة ومررره مالو اي علاقة بالاثار
وللمتعمق في اسرار المدينة المنورة يلاقي خير كثير منه خفي عن الكثير = )

و المحزن المبكي بالنسبة لاي شاب عاش في المدينة و تربى فيها
انه نسبة كبييرة كتير من شبابها و سكانها عندهم جهل كبير جداً في حكاية الاماكن الاثرية
و الاثر الكبير اللي كان من بعد سيدي و سيد الخلق رسول الله عليه وعلى اله افضل الصلاة و اتم التسليم ..!

بشكل عام ..

ما درسنا فمدارسنا اكتر من ١٠ ٪ عن دي الاثار او اماكنها او فضلها حتى
و درسنا باكتر من دي النسبة بكتييير عن الاثار في قصر المصمك و الدرعية و غيرها ..
حتى اي شخص الان حاب يعرف عن اثارنا هنا و حب يعمل سيرش بسيط في النت او بالطرق التقليدية ..
فمن البديهي جداً .. انه اذا بحث عن ١٠ اماكن اثرية يزورها في السعودية .. ٥ منها ع الاقل ماهي من اثار الرسول عليه الصلاة و السلام ، اللي انا برايي الشخصي اعتبره عليه صلاة الله وسلامه من اهم الاسباب اللي عمرت دي الارض بالزات = )

اللي خلاني اكتب عن دا الموضوع ..

اتقدرلي يكون لي علاقة ولو من بعيد شويا مع احد الناس المهتمين باثر مهم جداً في المدينة المنورة ..
واللي هوا بئر غرس ..

ويقع حالياً داخل املاك لاحد الاشخاص من اهل المدينة الافاضل ..

المهم في الموضوع ان صاحب دي الاملاك كان اتكلم عن انه يتمنى يكون دا المكان مشهد تاريخي لبئر هام لينا احنا كمسلمين برأيي بسبب حب الرسول عليه الصلاة و السلام فكان عليه الصلاة و السلام يحب ماء دي البير ، حتى انه وصى سيدنا علي لما حضرته الوفاة بأن [إذا مت فاغسلني من بئر غرس بسبع قرب]..
حتى انه قال فيها عليه افضل الصلاة و السلام عن ابن عمر رضي الله عنه قال: قال رسول الله صلى الله عليه وسلم وهو قاعد عند بئر غرس [رأيت الليلة كأني جالس على عين من عيون الجنة]، يعني بئر غرس.

فاي شي اكتر من كدا .. ؟

فصاحب دي الاملاك كان عنده اقتراحات بانه يكون دا المكان مزار و ينعمل كمكان اثري حتى يتمكن الناس من شوفته او ع الاقل المرور فيه تحت اي شرط كان نضمن فيه تعليم الناس و ننتبهلهم من اي بدعة ممكن تجي فبالهم عند زيارة دا المكان ..
لكن للاسف بشكل مباشر او غير مباشر اتواجهت دي الهمة بصد شديد و تهديد فبعض الاحيان بهدم المكان و ازالة الاثر من اصلو .. = )

و دا مجرد مثال بسييييط جداً لما واجهته اثار كتيرة في المدينة المنورة من هدم و ازالة عن بكرة ابيها بدون ترك اي دليل او اثر يدل عليها بعد كدا

ومن اهمها و الجدير بالذكر فيها القرار اللي صدر قريب بهدم مسجد الفتح في منطقة المساجد السبعة اللي وقعت فيها غزوة الخندق
واللي بقي منها فقط ٣ مساجد هي مسجد الفتح و مسجد سيدنا سلمان الفارسي و مسجد سيدنا عمر ..
بينما الخطة المحطوطة ع زعم تطوير المنطقة بمبلغ ٢١٤ مليون دولار لازالة المساجد التاريخية و استبدال مكانها مسجد كبير ما سمعت للان واللهي انو في احد من اهل المدينة اللي اعرفهم ع الاقل صلى فيه ركعة ..

و مسجد الفضيخ اللي ازيل من فترة طويلة و للاسف اغلبنا كان ما يعرف دا المسجد من اساسو

دا غير الابار اللي انهدمت و اهمها بئر الخاتم و غير المزارع اللي ازيلت و النخل الشهير في مزرعة سيدنا سلمان الفارسي اللي ازيل قبل سنوات قليله
و غير الاسوار و المباني اللي ما نعرف عنها ولا عن مكانها اي شي

و التناقض العجيب فنفس الوقت .. انه من كم سنة اتكتب في الجرايد عن ترميم حصن اليهودي كعب بن الاشرف في المدينة المنورة
وماتكتب اي شي عن هدم مكان واحد من اللي ذكرتها فوق دي

و من التناقض الغريب و الاغرب و العجيب جدا جدا برايي

انه ايهما احق بالاهتمام و الترميم اكتر الحصن ولا بير العهن مسلن ؟

مشربة ام ابراهيم و لا مدائن صالح مثلاً ؟

٢١٤ مليون دولار لهدم مساجد تاريخية و اثرية وليها فضل علينا و على كل مسلم بيتنفس فدي الارض ،، ولا اقل من ربع دا المبلغ لترميم مسجد واحد من السبعة اللي اتهدمت ؟؟

مدائن صالح اللي بيندفع الان مليارات عشان تكون معلم سياحي عالمي و تدخل عجايب الدنيا

و ينبني فيها اكتر من ٣ منتجعات سياحية لمنطقة كان الرسول عليه الصلاة و السلام يكره المرور فيها و يحث ع الاسراع لمن يوصلها و يمشي من جمبها و احنا بننظملها رحلات شبه يومية و معسكرات و مخيمات بالهبل جمبها ؟؟

مشاريع ياكترها ولا مشروع صغير انو يصير في كشك صغييييير قدام كل اثر من دي الاثار العظيمة يعلمو الناس فيلو الصح من الغلط و الحلال من الحرام وسور حوالينو احنا راضيين عشان ما يخش اي احد ؟؟

و سنة بعد سنة بينسوا اهل المدينة و شبابها دي الاثار

فابدن ماهو غريب اليوم وانا بتكلم عن شوية اثار انا شفتها بعيني قدام اصحابي في القهوة و اليوم مي موجودة .. و النص التاني من الشباب ماهو مصدقني لمن احلف انو اصلن في اثار تانية عمرهم ما سمعو عنها انها موجودة في المدينة المنورة

District 9 .. و مستوى ابيخ كمان و كمان !!

Bn 6argoo3a — Wed, 30 Sep 2009 15:16:39 +0000

قبل كم يوم شفت الفلم اللي صرع الدنيا الفترة الاخرانية District 9 – او المنطقة ٩ ..!
و للاسف كانت ساعة و اربعين دقيقة تقريبن ضايعة ع الاخر …

الفلم من كتابة و اخراج Niell Blomkamp ( اللي يعتبر دا الفلم الرابع ليه كمخرج )
و قام بدور البطولة ( اللي اعتبره نجح في تمثيل الشخصية دي كتير مع انو غير معروف كتير ) الممثل Sharlto Copley بدور Wikus Van De Merwe

تبدا حكاية الفلم بطريقة التصوير الوثائقية اللي بتحكي قصة سفينة فضائية جات ع الارض سنة ١٩٨٢ و وقفت فوق مدينة جوهانسبرغ في جنوب افريقيا
ولما تجي الحكومة تفتح السفينة تلاقي فيها الاف من الكائنات الفضائية اللي حالتها معدومة ع الاخر .. فتقرر الحكومة بمساعدة الجهاز الدولي المسؤول عن شئون الفضائيين اللي مسمينو MNU انها تسكنهم تحت السفينة مباشرة و تعاملهم كلاجئين تقدملهم الاكل و الشرب و المكان و كدا .. !!

بداية الفلم يكون التصوير زي ما قلت بشكل وثائقي و بطريقة الشيكي كام .. ودا اكتر شي بصراحة يخليك تتشد للفلم في البداية الاحداث و طريقة عرضها و تصويرها انه في احداث جاية مي طبيعية !!

يكمل الفلم حكاية الفضائيين و كيف انو الحكومة قررت تنقلهم لمكان جديد بدل المنطقة ٩ – فيتقرر تعيين (فيكوس) اللي مالو شغل في العمل الميداني انو يقود العملية الميدانية المسؤولة عن نقلهم للمكان الجديد اللي يبعد عن مكانهم الحالي حوالي ٢٠٠ كلم .. في دي العملية يتصاب العميل ( فيكوس ) بسائل معين يخليه يتحول و يسير من الفضائيين او نص بني ادمي و نص فضائي و يبدو يحاربوه و كدا .. !!

دي قصة الفلم بالمجمل .. اللي ما اعرف ليش استاهل ياخد ٨.٥ في imdb و انه يحتل المركز ٧١ في قائمة افضل ٢٥٠ فلم في التاريخ ..

الفلم ملئ بالسخافات و الاخطاء المنطقية اللي تتفه من الفلم ابداها من الاول اللي هي

١- طريقة عرض الفلم في البداية تنبأ بفلم مليان احداث جديدة ما تعودناها لكن للاسف من بعد اصابة ( فيكوس ) يبدا الفلم يسير عادي زيو زي اي فلم بيحكي حكاية فضائيين و كيف انو البشر اشرار و كل الحكومة تسير تبغى تحاربو ..!! ( الله يرحم ايامك يا E.T. ) ^ـ^

٢- الفكرة اللي سارت في المجمل انو دول الاوادم جو فوق المدينة سنة ١٩٨٢ و احداث الفلم ع اساس انو فسنة ٢٠١٠ يعني بعد ٢٠ سنة قررو ينقلوهم لمكان جديد بعيد عن سفينتهم اللي قعدو تحتها ٢٠ سنة وما عرفو يشغلوها و يرجعو بلدهم حتى انو احنا هنا سكان الارض عادي لو جات زي كدا سفينة فضائية فيها دول الشي رح نقعد عادي نخليهم يعيشو بيننا ومارح نهري ابوهم اختبارات و تحاليل و نفصفص سفينتهم الين ما نعرف اش فيها و كيف تشتغل ولا انو يقتلونا ولا نقتلهم عن بكرة ابيهم .. ما عادي يومتها العراق بتكون رجعت و فلسطين انحلت قضيتها و ماعاد في ارهاب بس ما عندنا شي الا دول الكائنات اللي اهل جنوب افريقيا بس متعايشين معاهم و باقي العالم طبيعي مكمل حياتو ولا على بالو !!

٣- بيورينا الفلم كمان كيف انو دي الكائنات الفضائية مرره همجيين في البداية و كيف انو حياتهم زبالة و بياكلو اي شي و بيقتلو بعض بقمة الهمجنة و دا الشي اللي يخلينا نفكر كيف انو دول الهمجيين عندهم كل دي التكنولوجيا في الاسلحة و السفينة حقتهم !!

٤- كمان دول المخلوقات كانو عادي مع كل الاسلحة المتطورة اللي عندهم و اللي ما في احد غيرهم ينفع يشغلها ما استخدموها عشان يتخلصو من الحصار اللي عليهم او يهاجمو الجيش اللي جا يقتلهم و يشردهم ببساطة لا كان عندهم استعداد يبادلوها بعلبة اكل بسس ولا وحدة افريقية يباتو معاها ..

٥- كيف انو لمن بدي ( فيكوس ) يتحول سار تفكير الـ MNU بدل ما يدرسوه و يدرسو حالتو و يعرفو يستفيدو منها سار كل همهم انو كيف يخلوه يشغل الاسلحة حقت الفضائيين

٦- من اسخف الايفكتات اللي شفتها بحياتي هيا تاثير الاسلحة لما بيستخدموها حقت الفضائيين يعني مع كل ابداع المخرج في اللقطات و التأثيرات و زوايا العرض كانت تأثيرات الناس لما تتفجر من الاسلحة كانها فلم من السبعينات ع الاغلب ..!

٧- الهفوات البسيطة كمان تتفه الفيلم بزيادة .. لمن يكون دا الادمي مطلوب و ماهم عارفين يجيبوه و قاعدين يستنوه يتصل عشان يعملولو تراكنق بدل ما كان يعملو دا الشي ما دام الموبايل حقو شغال من اول .. كمان لمن يقتحم المبنى حقهم و بكل بساطة نفس الكودات اللي كانت لمن هوا موجود بقيت زي ما هيا خصوصي القسم اللي ماكان هوا نفسو يعرف عنو بس يعرف الكود اللي يفتح الباب حقو !!

٨- كتير اشياء كمان غبيه في الفلم دا .. بس اسخفها كمان لمن اخينا يشغل السفينة ويجي يبغى يروح يترك كل الفضائيين اللي معاه ع اساس يجيهم بعد ٣ سنين بغض النظر عن الفوضى اللي كانت سايرة و انهم كانو مستعدين يبيدوهم كلهم بس هوا عادي شغل السفينة الضخمة اللي مافيها اي ميزات انو توقف كمن دقيقة تاخد الباقي و تمشي !!

بصراحة كتييير كمان اشياء بس دي اهم الاشياء اللي تسخف الفلم بدرجة كبيرة و من جد اش اللي مخليه ياخد كل دي الهيلمة ماني فاهم !!

ع العموم متابعة ممتعة p=

ايوه صح احلى شي في الفلم الترايلر تبعو ^^,

Unlike

I Am Sam

Bn 6argoo3a — Wed, 15 Oct 2008 05:30:37 +0000

(I Am Sam (2001

الفلم الخيالي ..

او نقدر نقول الفلم الأح بمعنى الكلمة ^^
الفلم اللي لما تخلص منو نفسك ترجع تعيدو تاني .. و نفسك اول ما خلص ترسل رسايل لكل اصحابك تقلهم انو دا الفلم روعة .. او تمشي في الشارع و تسلم ع الناس و تقلهم شوفو دا الفلم … ^^

I Am Sam .. من انتاج سنة 2001 ..
كتبه كرستين جونسون و جيسي نيلسون اللي قام برضو بإخراج الفلم ..

الفلم من بطولة المبدع الخرافي شون بين ..
و البطلة ميشيل فايفر ..

و الطفلة اللي تبكيني داكوتا فاننينغ

.
.

( سام داوسون ) .. انسان طيوووب لابعد درجة .. مشكلته انه بيعاني من مرض عقلي .. بيخليه انسان كبير و كدا بس انو بعقل طفل عمرو 7 سنوات ..

تبدأ الحكاية لمن يجري ( سام ) عشان يلحق مرتو اللي بتولد في المستشفى و يتزكر فجأة وهوا فنص شغلو انو يسيب كل شي و يجري عشان يلحقها ..

لكن مرتو من كتر مي حيوانة .. تقوم تسيبو بعد ما تولدلو بنوتة تجنن ..

وهنا تبدأ معاناة دا الادمي = ) ..

يبدا يحاول انو يعتني بدي الطفلة عشانو حبها .. و يبغى يربيها و يكبرها قدام عينو ..

نعيش مع ( سام ) كل لحظة وهو بيحاول يربي البنت و كيف ينحاس لمن يشيلها معاه ( ستاربكس ) محل ما يشتغل .. و لا لمن يجولو اصحابو التحف اللي زيو و اخس ..

وكيف يقعد يحاول يسوي انه هوا قادر يربيها و انو فاهم اش يعني كدا اساسا ..

بعد فترة تكبر البنت و يكبر عقلها وهنا اساس المشكلة لمن يسير عمرها 7 سنين ويكبر عقلها عن عقل ابوها .. ويسير خلاص يبدا يحس انو احححه اش بيصير .. ؟

هنا تبدا تدخل جماعاتهم دي اللي مدري اش تبغى .. عشان شافوا انو ( سام ) ما ينفع تعيش عندو بنتو اكتر من كدا ..

ويقعد يدور الدنيا و يجن جنانو بس عشان يدبر محامي يدافع عن قضيتو و يخليلو بنتو ..

وهنا يقابل ( ريتا ) المحامية .. اللي تقعد تطنش اهلو عشان هوا حالتو زي كدا و هيا مره شايفه نفسها على ايش ما ادري ..

وتقعد تصرفو و مدري ايش و هوا يا عيني عليه زي الاهبل مصدق و كل شويا يجيها الين يحشكها فيوم فحفلة و تقعد تسوي يزعط انها الكويسة و تشيل قضيتو ببلاش ..

.
.
ان ما بكيتو فـ ستين مقطع من دا الفلم ..
وان ما حسيتو بغصة فكل مشهد ..

نعيش معاه كل شي بقوة ..

وكيف لمن ياخد بنتو عشان يشتريلها جزمة جديدة وينحشك هوا وشلة الانس حقتو لمن يطلع ما معاهم فلوس تكفي ..

و بكاني تماماً لما قعد هوا وبنتو بيعلمها القراية ع اساس يا عيني عليه و يجي عند كلمة مو عارف يقراها و هي تسكت عشان ما تجرح ابوها = ( ..

والهبلة المحامية لمن يرحلها البيت عشان يتدرب و زي كدا و يقعد يقلها يا بختك و بخت اهلك انو مبسوطة مع ولدك و كدا .. وتقوم هيا توريه انه مررره ماهي مبسوطة و يقعد الفهيم يحللها مشاكلها ..

.
.
( شون بين ) اتقن الدور بشكل خيالي امكن ماشفتو على احد ..

طريقة كلامو .. و تعابير وشو .. وحركاتو …

يا الله قد اييييش كان خيالي الفلم فكل لحظة ….

لازم لازم تشوفوه ^_^

.
.
شوية صور من الفلم

.
.
و دا عرض الدعاية حق الفلم = (

http://www.youtube.com/watch?v=EROTbDCr5ag

اتمنى انو يعجبكم من جد = )

لانو واحد من اروع الافلام اللا شفتها بحياتي = )

Unlike

W A L L . E

Bn 6argoo3a — Sat, 04 Oct 2008 19:06:30 +0000

من اول ابا اكتب عن دا الفلم

بس كان انو رمضان و كدا فقلت استناكم

W A L L . E

الفلم من انتاج بيكسار ( 2008 ) ..
و يعتبر اظن الفلم السابع اللي انتجته دي الشركة ..
من اخراج و كتابة الرائع : آندرو ستانتون اللي اخرج توي ستوري ( الجزئين ) و فايندنق نيمو و بقز لايف و تقريبن اغلب افلام بيكسار ..

احتل الفلم بجدارة المركز الـ 30 من بين قائمة افضل 250 فلم

تقييم الـ IMDB :
8.7 / 10

من اكتر الاشياء اللي خلتني احب دا الفلم امكن لاني اتاثر بالانيميشن اكتر من الافلام الحقيقية ..

بداية الفلم كانت بتورينا دا الروبوت اللي اسمو ( وولي ) و كيف انو عايش وحيد على سطح الكرة الارضية بعد ما هجروها الناس كلهم ..

( وولي ) الروبوت اللي عايش حياتو من اول ما هجروها الناس بينفذ المهمة اللي صنعوه عشانها واللي هيا انو يحول زبالة الناس لمكعبات عشان تقلل من حجم المخلفات اللي صار كبير على سطح الكرة الارضية ..

بجانب إلى انو كان مأسس حياتو اللي على جمب و عايش جوو تماماً من ناحية العاطفة و الحب وكان دايمن بيحلم احلام تبكي ^^

بعد فترة يتقابل ( وولي ) مع ( إيفا ) اللي هيا روبوت انثى مصنوع برضو من قبل البشر اللي ارسلوها عشان تدرس حالة الارض من مجمل الدراسات اللي كان بيعمولها من فترة لفترة عن الارض عشان يرجعو يسكنو فيها ..

وطبعن صاحبنا من كتر ماهو فارغ عاطفين .. يقوم يحب ( إيفا ) و يسوي المستحيل عشان يوصلها ^^

دي قصة الفلم بشكل عام ..

بس اللي جوتو اكبر من كدا ..
لمن تعيش مع ( وولي ) كل احاسيسو الموجودة جوتو ..
و تحس معاه بكل شي بيشوفو بعيونو الدبلانة ..

لما تقتنع تماما ان دا الشي مو آلة دا انسان بيحس اكتر مننا ..

فعلاً كانت ساعة وشوية من الاحاسيس اللي بس تستناك تعيشها

قوة الفلم واللي اعتبرها خرافة فيه .. هوا انو مافيلو اي حوار .. فانت بتكتب الحوار وانت بتعيشو لحالك = )

نصيحة و نصيحة و نصحية ^^

في تعليق قريتو ع الفلم دا بعدين من دا نفسو ( آندرو – المخرج )
بيقول انو لما كانو فـ بيكسار .. بيحطو اللمسات الاخيرة على اطلاق حكاية لعبة ( Toy Story ) .. كانو ع الغدا قاعدين .. فوقتها قعدو يحطو مخططات للشخصيات الجاية اللي رح يعملوها فـ بيكسار ..
وكان واحد من دي المخططات انو يكون في روبوت وحيد ..

فبيقول ستانتون .. ” قلنا كيف سيكون الحال إذا رحل البشر (عن الكرة الأرضية) وبقي هناك إنسان آلي صغير يؤدي نفس المهام.. كانت هذه أتعس شخصية سمعت عنها ”

حبيت الفلم من قلبي ^^

———
شوية صور من الفلم ^^

دا الصرصار لحالو حكااااااااية p=

————-

موقع الفلم ع الـ IMDB
http://www.imdb.com/title/tt0910970/

التريلر تبع الفلم ..
http://www.youtube.com/watch?v=5e16U8UsT4I

ملف تورنت نسخة DVD
http://www.mininova.org/tor/1790592

ملف الترجمة العربي ..
http://subscene.com/arabic/WALL-E/subtitle-168619.aspx

Unlike