فكرة المقال عن انو كيف ممكن نخلي التويتر مكان يطورنا من ناحية التصوير اكتر .. !!

إزا لسا منك في Twitter فممكن انك تحسبو اساسن مكان عشان الناس تجي تكتب اش اتعشو امس .. ؟ولا من فين رايحين يشترو بكلة الشعر حقتهم .. ؟
ودا شي ساير هناك بس انو مع كدا هو فرصة و مكان مررره ممتاز عشان تقدر تطور من نفسك بيلو ..!!

كيف كدا ؟

انا مثلا من الناس اللي تحب التصوير .. و خاصة حكاية تصوير البورتريه ..
فبكل بساطة رح اتابع كل الناس اللي مهتمين بالتصوير و بتصوير البورتريه هناك من لمن اعمل سيرش عليهم = )

فبالتالي دي خمس اشياء ع الاقل رح تخلي Twitter يطور ادائك في التصوير .. !!

١- دوّرو على مصورين جداد ..
بمجرد ما انو نعمل Follow للمصورين دول فاحنا ارتبطنا بيهم من ناحية انو سرنا نقرا اخبارهم اول باول ..
نتكلم معاهم .. نرسلهم ملاحظاتنا .. كتير منهم رح يكونو مبسوطين بانهم يردو علينا و يساعدونا ..

٢- اخبار جديدة اول باول ..
برضو اغلبية المصورين الكبارية اللي بنتابعهم هناك
رح يضلوا يعملو ابديت بالاخبار الجديدة في التصوير و اش اخر تكنيك عملوه ولا اش اخر الحاجات الجديدة في السوق ..

٣- خدو رأي الناس بصوركم ..
لمن يكون سار عندنا عدد من الناس اللي بتتابعنا من المصورين هناك .. رح يسير سهل علينا انو نعرض صورنا الجديدة عليهم عشان ناخد رايهم و نحسن ادائنا
بس حط لنك لصورتك الجديدة و اسال الناس اللي بتتابعك عن رايهم بيها ( او ممكن نعملها بطريقة محددة اكتر انو نحط اللنك و نسالهم انو مممم دي الصورة مو كانها اوفراسكبوزد ؟ )

٤- اسألو و خدو اجوبة ..
الحلو في الموضوع انو تاخد اجوبة مباشرة على اي سؤال ممكن تحطو عن التصوير ( يعتمد بدرجة كبيرة ع عدد الناس اللي بتتابعك )
ودي حلاوتها انو بتاخد اجوبه واضحة و على طول = )

٥- تويتر يعلمنا نكون مختصرين ..
بما انو التويتر ما يمديك تكتب اكتر من ١٤٠ حرف فيلو .. فدي حاجة كويسة عشان نكون مختصرين و محددين احنا اش نبغى بالزبط
سواء باسألتنا او بإجوبتنا ع الناس .. كدا نكون قدمنا الشي المباشر اللي احنا نبغاه و سمعنا تمامن الشي اللي نبغى نسمعو ^_^

كيف نستفيد من تويتر باكتر حاجة ممكنة : هوا انو ندي اكتر من ما ناخد = )

لانو تويتر مو بس عشان نقرا افكار الناس و لا نشوف اخبارهم و نجي ماشيين .. لا
الحكاية انو ماحد رح يعبرنا ازا ماكنا نشيطين هناك .. نحاول نساعد الناس اللي بيتابعونا و نتابعهم ازا احتاجوا شي احنا نعرفو
عشان في الوقت اللي نعرض فيه شي ع تويتر يكونو جاهزين يسمعو مننا ^_^

وكيف نبدا بدا الـ Twitter .. ؟

اوكي ..

اول شي .. خلينا نسجل اكاونت جديد في www.twitter.com

تاني شي .. دورو على الاشياء المختصة بالتصوير عشان نتابعها .. ( هادي شوية اكاونتات لناس عشان نستفيد منهم : Scott Kelby / Steve Brardi / @artwolfe / @chasejarvis / @jeremycowart / @neilcreek / @jimgoldstein / @ricksammon / @scottbourne / @zarias / @strobist/ JunkieeNet )

تالت شي .. نبدا ننطلق في تويتر .. نتشارك المواقع الكويسة .. نرد ع الناس .. نحط صورنا اللي اخدناها …. و زي كدا ^_^

اتمنى نشوفكم هناك قريب = )

Like

Unlike

او بالأصح يمكن كم احد مننا يعرف اش معناة النكبة ؟

طيب مين اللي أعلن قيام دولة و سماها اسرائيل فوق اراضي الارض المحتلة ( فلسطين ) ؟

طيب ازا كنا احنا نعرف كم واحد من عيلتنا القريبين بيعرف دا الشي برضو ؟

طيب اساسن اش اللي سار في مايو من 61 سنة ؟

بكدا و بدي الأسئلة و اكتر منها بكتير كانت بداية فكرة حملة ذاكرة الحجارة 

بعد 61 سنة من الإعلان الرسمي لما يسمى دولة إسرائيل و بالتحديد في 15 مايو سنة 1948 ..
هنا قرروا مجموعة من الشباب فجدة بتترأسهم الاستازة الاكتر من رائعة ( هداية عباس ) انهم يعملوا حملة طوال شهر مايو بتزكر الناس بالقضية و بتزكرهم بالاخص بالنكبة ..

 الهدف من دي الحملة كان توعية الجيل الحالي و الجيل اللي جي عن القضية الفلسطينية .. اللي للاسف نصنا الآن نسيها 

و دا كان من اشهر المقولات اللي قالها بن غوريونانه ( علينا أن ننتظر انتهاء جيل الفلسطينيين 48 والجيل التالي سينسى )

فكان دا اكبر اهداف الحملة انو دا الشي لازم ما يسير و لازم تبقى فلسطين عايشة بينا و موجودة و بنشيل همها و نشيلوا لاولادنا من بعدنا .. 

على مدى شهر كامل كانت الحملة بقيادة الاستازة هداية و الاستاز أحمد صبري ..
اللي من جد قد ما قعدت اشكرهم مارح اعرف اوصلهم شكري و امتناني ليهم على الكم الهائل من المعلومات و الاستفادة و التاريخ اللي انا نفسي ما كنت اعرفو .. 

وجود دي الحملة ماكان مجرد نشاط ناتج بعد ما سارت حرب غزة الاخرانية .. فالاستازة هداية انربط اسمها ( ببالي ع الاقل ) بالقضية الفلسطينية  فيامن تلاقيها بتحاور و بتشارك في مؤتمرات او لقائات صحفية او هيا بتروح للناس الكبار في السن عشان تسمع معلومة او خبر او قصة من شاهد عيان .. 

الحملة كانت متواجدة في كتير اماكن في جدة .. فكانت بداية الحملة يوم 1 مايو هو يوم تدشين الحملة في أندلسية .. 

و كان ليهم عدة نشاطات منها معارض و نشاطات قامت في جامعة الملك عبد العزيز .. و كلية دار الحكمة .. بالاضافة لمركز تطوير الذات ( SDC ) في الرد سي مول .. و كمان في سوق البساتين ، نهاية بيوم الثلاثاء الماضي 26 مايو في منزل المكية ..

و ان شاء الله رح اعمل كم ريبورت كدا عن فعاليات الحملة اللي قدرت احضرها و اكون معاهم فيها ^_^

روابط :

- عنوان الحملة على الـ Facebook
- الحملة في Saudi Gazette
- مقال مشترك بين أحمد صبري و هداية عباس في Arab News  
 - حرب 1948 على الـWikipedia

Like

Unlike

بداية بالـ Facebook و نهاية اليوم بالـ Twitter

حلاوتو انها من اسهل ما يكون و لزيييز مرره باستخدامو .. = )

من الموبايل و من كل مطرح يمديني سار اعرف ^_^

المهم لا يكتر و نشوفكم هناك ^_^

follow me there

Like

Unlike

Tuesday 14th of April, 2009

Please read the full text following the URL below

http://www.arabnews.com/?page=9&section=0&article=121501&d=14&m=4&y=2009 

Like

Unlike

.

.

.

قبل شهر تقريباً ..

كلمني ( عمار آل محمود ) – و هوا اخ بالنسبالي و يمكن والله أعز .. 
لانه من أكتر الناس اللي أحترمهم و أعزهم بطريقة مو طبيعية .. و أتشرف بمعرفتهم كتييييييير الشرف ..

يومتها لمن كلمني طارت وصلة من عقلي من كتر الفرح لمن كان بيخبرني انه ماشاء الله تبارك الله ربي تمم عليه و بيعزمني ع حفلة الملكة حقتو ( كتب الكتاب – عقد قران … الخ ) 
و طلب مني طلب انو ازا اقدر اجي و اجيب كمرتي عشين اصورلو الحفلة .. 

طبعن انا مررره ما صدقت نفسي ساعتها ومررره حسيت انه شرف كبير ليا بالاضافة إلى انها مهمة صعبة بالنسبالي لانو نادراً او امكن دي اول مره اصلن أصور بيها حفل مهم زي كدا = )

 طبعن من وقتها و من يومت ما كلمني وانا قعدت ازبط نفسي عشين ما الخبط فداكا اليوم .. 
و ما خليت شي يعتب عليا ..

xoxo

طبعن كأول فكرة كانت إني رجعت لكتاب Scott Kelby الاخراني اللي هوا (  The Digital Photography Book : Vol.2 )
واللي فيلو شابتر كامل عن دا الموضوع … .

طبعن استفدت منو بشكل اساسي الشي الكتير ^_^

بس كان بيقول نقطة انو .. ” فزي كدا حالات للتصوير و اللي هيا عادتن بتكون اغلب لحظاتها سواني .. فالافضل اننا نجهز لستة بالصور اللي نبا نصورها عشين نوفر الوقت هناك .. “

وطبعن هوا قال انو في لستات جاهزة موجودة ع النت خاصة بتصوير الزواجات بشكل خاص ..

ouch *_*

فانا بس قلت هيا دي و قعدت ادعبس في النت لمن طلعت عيوني وانا بشوف لستات مررره رهيبة و حلوة .. و فعلن كلها مفيدة

حتى لقيت دي اللستة .. اللي هيا ..

A List of 50 must have wedding photos

يعني باللهي اش اخطر من كدا .. ؟ 

50 فكرة لـ 50 صورة اتوقع انها كانت تكون كافية بالنسبة لاي واحد رايح يصور …
بس للاسف .. لمن اخدت فكرة عن الموضوع  لقيت انو تلات ارباع دي اللستة ما ينفع فحفلاتنا احنا و زي كدا ^_^
خصوصي حكاية رقم ( 23 ) ما نهضمت معايا p= 

طبعن داكا اليوم ان شاء الله اني اكون عملت شي كويس … 

بس المهم اللي وصلتلو انو لازم ازبطلي لستة تفيدني و تفيد اي احد ينحط فموقف و حابب يطلع بصور حلوة فحفلة زواج ولا ملكة ولا شي زي كدا 

الفكرة انو ما نبغى نقدم صور بصراحة كدا من زي حقت اللي في ليالينا و لا اللي نص مشاغل الافراح بيسووها لانو بصراحة ياما شفت و ياما حسيت انها ناقصة و بدها فكرة الابداع شوية كمن تكّه .. 

و بنفس الوقت نبغى نوصل للستة تناسب جو حفلاتنا بعاداتنا و تقاليدنا = ) 

فكل مين يمر من هنا يجي يحط افكار لصور ممكن اننا نتعلم منها او يتعلم من اللي محطوط ويسير اقعد اعمل ابديت لدا الموضوع قد ما اقدر و نزبطو ونحطو فبلوق جديد يستفيد منو اي حدن حابب انو يصور زي كدا 

UPDATE

مررره احب اشكر اخويا محمود اكرم اللي ماشاء الله عليه بدي يزبط الامور تمام ميه ميه ..
واتحفنا بشوية افكار يوم تصوير الزواجات منها ..
طبعا كملاحظة انو مرره نفسي نطلع شويا عن الصور التقليدية العادية …
فخلينا كمان نحاول نطلع افكار لصور مجهزة مسبقاً مع الاتفاق مع العريس ..
كمان بنفس الوقت صور لو كانت بنت بتصور فحفلة الحريم او بتصور العروسة ..

فدي بداية اللستة ^_^ 

صور خاصة بتجهيزات الحفلة ^_^

عربية الملكة
علبة الملكة
سيارة العريس واقفه
سيارة العريس لمن يوصل
بورتريهات للحضور
الفرقة اللي جات  
الاتاريك و المعاشر و دي الحبشتكات  

و صور خاصة بالأهل

العريس مع اخوانه 
العريس مع ابوه أو اخوه الكبير 
العريس مع ابو العروسه او …. العروسه ….(:
العريس مع اخوان العروسه واقاربها
العريس مع جدو وسيدو

صور في نص الحفل 

العريس مع المعازيم
العريس وقت الرقص
لأهل العريس وقت الرقص
مثلا ( لو رقص العريس مع الوالد او احد الاخوان او ابو العروسه …..الخ )

صور للملكة ( عقد القران ) ..

المملك وهو يكتب العقد
العريس وهو يوقع عقد القرآن
أبو العروسه وهو يوقع العقد

تمام كدا ^_^ .. ؟

.

.

Like

Unlike

بالزبط .. زي ما بقول كدا ^ـ^

و من باب اني انسان احب اتفشخر باشيائي فعشين كدا قلت اكتب هنا

و بنفس الوقت اكتشف كيف صوتي طالع مع الماك ^ـ^

طبعن ما احكيكم عن قد ايش الفرق ..

و اول كلمة جات ببالي بعد اقل من تلات ايام من استخدامو قلت انو .. احنا سرلنا ٢٠ سنة مضحوك علينا من جماعة الميكروسوفت

http://www.apple.com/macbookpro/features-15inch.html

MacBook Pro 15-inch

اخترت دا الماك عشين حسيت انو انسب شي ( خصوصن لو حكينا عن مبدأ الفلوس .. فاسمحولي ^ـ^ )

و غير كدا من زمان حسيت انو ازبط شي = )

فالبنهاية انو … اهلن بالماك … و الله يبعد عنكم شر المايكروسوفت و توابعو p=

Like

Unlike

بس كـ فهم انا فهمتو قريب جداً بشكل نقدر نقول كامل .. = )

حكاية التعريض وما التعريض أو الـ Exposure اللي هوا كل ما نتكلم عن مصور ولا صورة لازم نسمع دي الكلمة ..

P.s
من اول انا اعرف اش يعني اكسبوجر بس انو اش يعني تعريض والله اول ما كنت افهم
الين جاني سيدي و حبيبي باهي مشاط وفهمني انو تعريض يعني تعريض السنسور للنور
وانا كنت احسبها انو تعريض من العرض يعني كدا نمطو بالعرض ولا شي زي كدا ^_^

فالفكرة انو اش يعني تعريض وكيف نقدر نحصل على تعريض مناسب لاي صورة نصورها .. ؟

طيب في البداية التعريض زي ما قلي باهي وقلتلكم انو هوا فترة تعريض السنسور ( الفلم زمان ) للضوء ..
وبناءً على عدة عوامل بتزيد نسبة التعريض او بتنقص ..

اش هيا دي العوامل .. ؟

بكل بساطة هيا تلات عوامل بتعمل التعريض .. اللي هيا

تلات عوامل اللي هيا ..

1. ISO .. و اللي هوا درجة حساسية السنسور للضوء ..
2. Shutter Speed .. سرعة الغالق .. واللي هوا المدة اللي رح تبقة العدسة مفتوحة فيها وبتسمح للنور انو يدخل
3. Aperture .. فتحة العدسة .. واللي هوا مقاس فتحة العدسة اللي بتحدد كمية النور الداخل للسنسور ,,

فبدي التلات عوامل احنا بنطلع صورة تعريضها مزبوط ..

نتخيلها كيف .. ؟

By : Chris

نتخيل الكاميرا كانها شباك .. 
وليها ضرفات تفك و تنقفل .. ( اللي هيا الشتر – الغالق )

و انو مقاس الشباك هوا زي فتحة العدسة عندنا ..

وانك انتا واقف جوا الغرفة ومررره ضلمة جوا و لابس نضارة شمسية ( اللي هيا الآيزو ) <<كانو تخلف ضلمة ونضارة شمسية p=

فدحين في عدة طرق عشان تقدر تتحكم بالنور جوت دي الغرفة ..

فيا اما انك تسير تفتح الضرفات و تقفلها بشكل بطئ عشين يدخل نور زيادة او بشكل سريع عشين يدخل نور اقل

او انك تكبر مقاس الطاقة عشين يدخل نور كتير او تصغرها عشان يدخل نور اقل 

و النضارة في الاخير يا اما انك تلبس وحدة اغمق عشين يقل النور او تشيلها عشين يكتر النور 

فبكدا ..

سرعة فتحك و تقفيلك للطاقة رح يكون زي الشتر سبيد في كاميرتك

و مقاس الطاقة و كبرها ولا صغرها رح تكون زي مقاس فتحة العدسة عندك

والنضارة رح تكون زي الايزو لما تكون لابسها رح ايزو قليل ولما تشيلها رح يكون الايزو عالي عشين عينك تتحسس النور ..

فبدا المثلث احنا فهمنا كيف نزود او ننقص النور في صورتنا اللي نبغى نصورها ..
لكن في احيان كتير رح ننحكم بمقاسات معينة سواء للايزو او الشتر سبيد او فتحة العدسة .. لانو كدا بشكل سريع :
- لما تكبر فتحة العدسة رح يقل عمق الميدان ويسير جزء من الصورة بس في الفوكس و الباقي برا الفوكس ..
- العكس بالعكس لما نصغر فتحة العدسة رح يكتر عمق الميدان ورح تسير الصورة حادة اكتر  ..
هنا رح ننحكم بفتحة عدسة ثابتة ما نقدر نغيرها .. ^_^ 

- لما يكون في جسم سريع و محتاجين نجمد حركتو رح نحتاج شتر سبيد عالي ..
هنا رح ننحكم بشتر سبيد عالي غالباً ما نقدر نقللو .. ^_^ 

- ولما نرفع الآيزو فوق الـ 400 باغلب الكاميرات رح يعطينا تشويش في الصورة ..

وزي كدا امثلة كتير ..

انتو فكروا فيها منطقيا في كل حالة من الحالات اللي انا قلتها ..
وشوفو اش رح يكون الحل لو انحكمنا بتثبيت واحد من دول التلاتة بمقاس معين .. كيف رح نوازن النور حقنا .. ؟؟

عشين نوازن النور في الصورة لازم يكون مقياس النور في الناضور حق الكاميرا جاي على الصفر

اوكي كدا … ؟ ^_^

Like

Unlike

بس كان انو رمضان و كدا فقلت استناكم

W A L L . E

الفلم من انتاج بيكسار ( 2008 ) ..
و يعتبر اظن الفلم السابع اللي انتجته دي الشركة ..
من اخراج و كتابة الرائع : آندرو ستانتون اللي اخرج توي ستوري ( الجزئين ) و فايندنق نيمو و بقز لايف و تقريبن اغلب افلام بيكسار ..

احتل الفلم بجدارة المركز الـ 30 من بين قائمة افضل 250 فلم

تقييم الـ IMDB :
8.7 / 10

من اكتر الاشياء اللي خلتني احب دا الفلم امكن لاني اتاثر بالانيميشن اكتر من الافلام الحقيقية ..

بداية الفلم كانت بتورينا دا الروبوت اللي اسمو ( وولي ) و كيف انو عايش وحيد على سطح الكرة الارضية بعد ما هجروها الناس كلهم ..

( وولي ) الروبوت اللي عايش حياتو من اول ما هجروها الناس بينفذ المهمة اللي صنعوه عشانها واللي هيا انو يحول زبالة الناس لمكعبات عشان تقلل من حجم المخلفات اللي صار كبير على سطح الكرة الارضية ..

بجانب إلى انو كان مأسس حياتو اللي على جمب و عايش جوو تماماً من ناحية العاطفة و الحب وكان دايمن بيحلم احلام تبكي ^^

بعد فترة يتقابل ( وولي ) مع ( إيفا ) اللي هيا روبوت انثى مصنوع برضو من قبل البشر اللي ارسلوها عشان تدرس حالة الارض من مجمل الدراسات اللي كان بيعمولها من فترة لفترة عن الارض عشان يرجعو يسكنو فيها ..

وطبعن صاحبنا من كتر ماهو فارغ عاطفين .. يقوم يحب ( إيفا ) و يسوي المستحيل عشان يوصلها ^^

دي قصة الفلم بشكل عام ..

بس اللي جوتو اكبر من كدا ..
لمن تعيش مع ( وولي ) كل احاسيسو الموجودة جوتو ..
و تحس معاه بكل شي بيشوفو بعيونو الدبلانة ..

لما تقتنع تماما ان دا الشي مو آلة دا انسان بيحس اكتر مننا ..

فعلاً كانت ساعة وشوية من الاحاسيس اللي بس تستناك تعيشها

قوة الفلم واللي اعتبرها خرافة فيه .. هوا انو مافيلو اي حوار .. فانت بتكتب الحوار وانت بتعيشو لحالك = )

نصيحة و نصيحة و نصحية ^^

في تعليق قريتو ع الفلم دا بعدين من دا نفسو ( آندرو – المخرج )
بيقول انو لما كانو فـ بيكسار .. بيحطو اللمسات الاخيرة على اطلاق حكاية لعبة ( Toy Story ) .. كانو ع الغدا قاعدين .. فوقتها قعدو يحطو مخططات للشخصيات الجاية اللي رح يعملوها فـ بيكسار ..
وكان واحد من دي المخططات انو يكون في روبوت وحيد ..

فبيقول ستانتون .. ” قلنا كيف سيكون الحال إذا رحل البشر (عن الكرة الأرضية) وبقي هناك إنسان آلي صغير يؤدي نفس المهام.. كانت هذه أتعس شخصية سمعت عنها ”

حبيت الفلم من قلبي ^^

———
شوية صور من الفلم ^^

دا الصرصار لحالو حكااااااااية p=

————-

موقع الفلم ع الـ IMDB
http://www.imdb.com/title/tt0910970/

التريلر تبع الفلم ..
http://www.youtube.com/watch?v=5e16U8UsT4I

ملف تورنت نسخة DVD
http://www.mininova.org/tor/1790592

ملف الترجمة العربي ..
http://subscene.com/arabic/WALL-E/subtitle-168619.aspx

Like

Unlike

C H A P T E R – 192

متغيرة تلك الطقوس ..
فيوم كـ خريف ..
ويوم كـ خريف … .
وباقي ايامنا جافة كما الخريف = ) ..

.
.
نشعر بـ الوحدة دائما بعد برهة … .
فوجوده ضروري ..
يعرف جيداً كيف يوزع الأدوار على جنبات الطريق ..
فتلك الأوراق لم تسقط إلا لتفضحنا ع الملأ …

موسم احمق ..
ذاك الذي يشي بنا على أعين المارة ..

.
.
اكره الخريف ..
يتبعثر بسهولة ..
و يهترئ ببساطة …
ويترك اشجاري عارية في مهب الريح … .

عاق ..
و جاهل …
و يعيش كل عام مراهقـ ه ..

.
.
كيف نسند ظهورنا لهذا الموسم الخائن .. ؟
دعوه يرحل ببطء ..
لم لا تتفق عليه باقي الفصول …
و تجعل له عاماً وحده ..

عام نرحل فيه كلنا عنه ..
ليعصف وحيداً على خواء الارصفة ..
دعونا نتركه ينوح خالياً و لنشمت به من بعيد …

.
.
كريه يا ايها الخريف ..
كريه انت يا ايها الاصفر …
تبقى رائحتك دائماً معلقة بالخيانة … .
على أطرافنا ننفضك كل عام ..
فتعود كشحاذ على أبوابها ترجو …

دموعك لم تعد تخدع ..
و طهر الشتاء علمنا أن نغسل قذارتك ..
ابتعد … فماعدت ذاك الفصل الرابع الذي يكتمل به العام …

.
.
ارجوك ارحل = (
اتوسل لكل اوراقك ان تذهب
كل الاحزان تبدأ في الخريف
وكل الالم أراه فيك

ارجوك ايها القاسي
ابتعد قليلاً حتى ينتهي العام
ابتعد مقدار الم
او ابتعد قدر رحيل
اقتطف بدل اوراقك اياماَ من عمري
وارمها بعيداً في رياحك الجافة
ادعوك لان تيبس باقي سنيني كما يبستها
فقط لترحل

= (

Like

Unlike