Healing – 2010

Making of Photos and blog might be upload soon =)

او انو اقدر اساهم بشويا بس من اني اوري الناس قد ايش دي الاشياء عظيمة .. و قد ايش لمن الواحد يكون هناك رح يحس بعظمتها و الروحانية اللي موجودة فيها ..!
اللي ما انكر وجودها ولا اي بشر قدر يكون هناك =)

واحد من دي الاماكن هو المسجد النبوي .. مسجد سيدي عليه افضل الصلاة و السلام !
في  كل مره احاول كنت اروح اصور .. اتحنس انو ماني قادر اعمل صورة حلوة افتخر اقول انو والله دي الصورة انا صورتها للمكان الطاهر دا !!
و لو ارجع بالتفاصيل او حتى اي حدن منكم يراجع حسابي في فلكر يمكن كل اللي موجودة فيه شويت صور تنعد ع الاصابع للحرم ..!

فيوم من الايام كلمني واحد من اصدقائي امتن ليه بقية عمري للفرصة اللي عرضها علي ..
اتصلبي وليد يقلي عن مشروع قائم كواحد من مشاريع مجمع الملك فهد لطباعة المصحف الشريف في المدينة المنورة باسم Virtual Reality

واللي كانت فكرتو تصوير الحرم النبوي بطريقة ما سارت قبل كدا ..!
( و برأيي  ماراح تسير ابداً بعد كدا بدي الطريقة =) )

استغرق المشروع فترة قالولي تقريبا اخدت ١٠ سنوات من بدء طرح الفكرة و التخطيط ليها و دراستها و كدا
و لغاية اليوم اللي شرفني بيه رب العالمين و شرف كاميرتي اني اكون معاهم في دا المشروع الاسبوع الماضي تقريباً

المشروع كانت فكرتو انو يتم تصوير الحرم النبوي بالكامل بكل اجزائو و تفاصيلو بطريقة البانوراما ..
و مو اي بانوراما كان التصوير بمعدات رهيبة و على مدى ٥ سنوات تقريباً عشين يصورو الحرم كامل من جوا بطريقة الـ Spherical Panorama  او يعني بطريقة ٣٦٠ درجة

المبدع و الاستاذ و المربي و صاحب الطف اخلاق قابلتها بحياتي ..
الاستاذ علي برناوي ( مدير قسم الحاسب الالي في مجمع الملك فهد )

كان قائد فريق التصوير اللي بيتشغل ع المشروع ..!
ما انسى فضل الاستاذ علي ليا بعد رب العالمين عز و جل ..

من اول يوم اتقابلنا و حكاني عن المشروع حسيت قد ايش عند الانسان دا رسالة من ورا المشروع عظيمة

قد ايش حسسني انو يا رب تكتبني اكون مشارك ولو بشي بسيط بدا الموضوع

قد ايش وراني اخلاص و تفاني و دقة في العمل .. قليل والله انو نشوفها عند اي احد تاني ..

من اول يوم زودني بفيديوهات و كتب تعليمية عن دا النوع من التصوير اللي عن جد قبلها ما كنت اعرف عنو اكتر من كلمتين او تلاتة !!

شاكر و ممتن ليك سيدي علي و يعلم الله انو اتعلمت منك كتييير الكتير ..
الله يجزاك خير !!

اللي صار بعدها انو حددنا اول يوم للتصوير اللي رح اكون بساعدهم فيه ..
بحكم انو الفترة اللي صورو فيها الحرم الداخلي تقريباً انتهت و خلصوا ما شاء الله عليهم كامل تفاصيل الحرم من جوا

اتخيلو بكرت النهار ان شاء الله لمن ينتهي المشروع دا و يطلع ما رح تتخيلو قد ايش رائع
و قد ايش حتكون اول مره لكتييييير مننا ( و انا اولكم برغم اني ع اساس عشت طول عمري كامل في المدينة )

لمن حيسير لينا امكانية نتمشى افتراضياً جوت الحرم النبوي

نوقف قدام الحجرة الشريفة … و نقرب ونشوف ادق التفاصيل اللي ع الباب
او اش مكتوب في السقف ..
او حتى لمن نوقف في الروضة الشريفة برضو ..
و نطول هنااك براحتنا !
و نروح للمحراب .. و مكان ما يصلي الرسول عليه الصلاة و السلام !
ولا لمن نروح الدكات
او عند باب السلام
او … او … او …

يعني كل التفاصيل اللي ياما و ياما عدينا جمبها بسرعة
او احيان كتير اصلن ما جاتنا الفرصة نروحها او نشوفها بتأمل كدا !!

رح تكون كلها على DVD ان شاء الله
يخلينا نشوف كل دي الاشياء بتفصيل التفصيل كمان =)

المهم …

انو بحكم انو التصوير الداخلي انتهى من فترة
و الان قربت تنتهي كمان توسعة خادم الحرمين الشريفين الملك عبد الله .. جزاه الله عنا و عن المسلمين كل الخير و الجزاء
كان دوري انو اساعد معاهم في تصوير دي التوسعة و اضافتها للمشروع ..!
بالإضافة لتصوير لقطات ثابتة للحرم من زوايا تانية !!

دا من اكبر و اهم الاحلام اللي كنت بسعالها في حياتي .. و الحمدلله الحمدلله الحمدلله قدرت اوقف وسط دا الحلم و اكون فيه

ويا رب يا رب يتقبل ربي سبحانه و تعالى دا الشي اللي قدمته يا رب =)

اول مره كنا هناك يوم الجمعة .. في وقت الصلاة .. صلاة الجمعة

كان الهدف من اللقطة دي اننا نصور حجم التوسعة الجارية و نبين الناس وهما محتويتهم التوسعة الجديدة ..

بعدها بفترة برضو كان المقرر اننا نطلع على سطح احد الفنادق القريبة من الحرم و ناخد لقطات كمان تانية للحرم بشكل عام و واسع لكامل الحرم !

اليوم الاخير كان الحلم ..

لمن طلعنا من فجر اليوم لسطح الحرم النبوي !
كان المقرر اننا نصور من المنارات ومن السطح باقي التغطية للحرم !

لاول مره فحياتي بديت احس انو انا فين ،،، !

طيب ليش انا .. ؟

اول خطوة خطيتها على سطح الحرم كان عن طريق وحدة من المنارات .. و بالتحديد التحديد المنارة الغربية الجنوبية !

اول احساس جاني هناك انو كتييير جو المدينة من كل مكان و فكل زمان تقريباً
بس هل الكل قدرو يشوفو المكان الطاهر العظيم دي زي ما انا بشوفو دحين ؟؟

طيب هل رح اقدر انقل دي الصورة زي ماهوا مطلوب مني ..؟

اللي انا متاكد منو تماماً انو مستحيييل الاحساس يوصل مهما كان و مهما حيكون بنفس الاحساس لمن يكون الواحد هناك

طبعا للعارف بالحرم حيعرف انو دي المنارة بعيدة شويا عن القبة الخضرا اللي هيا روح المكان

وتحتها تماماً قبر سيدي الرسول و حبيبي محمد عليه و على اله افضل الصلاة و اتم التسليم !!

بدينا التصوير لكل شي تقريباً

لكل جزء بيوري اي احساس تجاه هادا المكان !

وكل ما كنت بقرب للقبة كل ما كانت رجولي بتعجز تشيلني فديكا اللحظات !

الييين وصلنا تماما مقابل القبة الخضرا !

العظيم في الموضوع الاحساس .. الف مره بتكلم عن دا الاحساس بحاول اني بس اوصلكم كيف ممكن يكون .. وبعجز

المستحيل بعينو انو الواحد يقدر يعرف اش نوع الاحساس اللي يكون هناك =)

هل هو حب للمكان وساكن المكان عليه الصلاة و السلام ؟

ولا هو شوق ؟ ولا هو خوف ؟ ولا حزن ولا فرح ولا زعل ولا رهبة ولا ولا ولا ولا ….

قررت عن نفسي بعد ما عجزت نفسي و روحي عن وصفه انه دا الاحساس من نوع الاحاسيس الخاصة بالمكان

يعني مستحيل ينوصف او نشبهو او نقربو لاي احساس تاني عشناه في اي يوم من حياتنا = )

الرجفة .. الخوف .. الدموع و انا بحاول اصور المكان قد ما اقدر عشين مستحيل اعرف ايت زاوية و لا ايت مكان هوا اللي حيوصل فهمنا للمكان للناس اللي رح تشوف الصور بعدين خلاني اتوه تماماً

و نفس الاسألة دائماً .. انو يا رب ليك الحمد و الشكر انو خليتني اكون بدا المكان ..
فيا رب دلني اعمل الصح هنا و اقدر اؤدي المهمة دي بشكل صح !

انو يا رب في الاف الالاف من المصورين اللي احسن مني بمليون مره .. و يقدرو يوصلو عظمة دا المكان احسن مني بمراحل !

فيارب بس كون معايا =)

كنت اتمنى انو الوقت ما يخلص هناك ..
انو توقف الدنيا ساعات و ساعات و ايام عشين بس اقدر اعيش اللحظة دي عمري و عمري و عمر تاني فوقو !

بس كان لا بد من انو ننزل في النهاية

انو يكون درس حياة و علم و تاريخ و ذكرى تستمر اتوقع لنهاية حياتنا الدنيا دي … نفتكر و نديم الصلاة على خير الخلق قاطبة .. من سكن طيبة .. و من سكن الحرم النبوي و من كان قبره عليه الصلاة و السلام اقرب ليا من اي وقت مضى و اي وقت جاي =)

حتى مع دي الكلمات اللي كتبتها … انا عارف و متيقن انو مارح تكون بحجم الذكرى اللي تركها المكان فيا ..
ولا بعظمة الاحساس اللي كان فيني داكا اليوم .. =)

مررره و انا هناك كانت تحضرني قصيدة الدكتور وافي الحاج ماجد

لمن يقول

فمحاسِنُ الأخلاقِ إنْ حُشِدَتْ فَلَيْسَتْ غَيْرَ سَطْرٍ في كتاب محمّدِ
وعرائِسُ الأَزْهارِ إِنْ نَفَحَتْ فَلَيْسَتْ غيرَ عِطْرٍ مِنْ عَبيرِ محمّدِ
ومناقِبُ الساداتِ إنْ سَطَعَتْ فَلَيْسَتْ غيرَ نجمٍ في سَمَاءِ محمّدِ
وروائِعُ الأشعارِ إنْ وَصَفَتْ تَنَاهى الحُسْنُ فيها مِن جمالِ محمّدِ
وبلابلُ الأطيارِ إنْ صَدَحَتْ ففي معنىً يفيض محبّةً لمحمّدِ
ومدائحُ البُلَغاءِ إِنْ تُلِيَتْ فما هيَ كُفءُ حَرْفٍ من حروفِ محمّدِ
فإذا مدحتُ محمّدًا بقصيدتي فلقد مدحت قصيدتي بمحمّدِ

ان شاء الله تعالى رح يشوف الـ DVD دا النور قريباً جداً

ومن كرم الله عز و جل ان المقرر يكون بيتوزع مجاناً عن طريق مجمع الملك فهد الله يجزاهم خير جميعاً

كل مين ساعد و كل مين كتب و كل مين اشتغل او فكر بدا المشروع الهي ربي يكتبلهم الخير و الاجر لعظمة دا المشروع …

Like

Unlike

(١)

يكبر الكهل اياماً قليلة ..
بعكس الصبي الذي تتخايل له حياته القادمة مفعمة بالتخطيط ..
فتتسارع لحظاته معلنة و لاعنة الكهولة !
على طاولة خشبية مهترئة يراجع مخططاته واحدة تلو أخرى
لعله يضغط على احداها بقوة ليعود سنوات معدودات …

و كما المستحيل يكون الامل !

(٢)

تستيقظ كل صباح ..
تجهز له قميصه السماوي باناقة ..
تهتم كثيرا في الفترة الاخيرة باختيار ربطة عنق تدل على وجودها في حياته ..
افطاره الصباحي داذماً بانتظاره ..
تساعده في عقد تلك الربطة ..
لعلها هذه المرة تحكم اغلاقها كي لا يعود !
يغادر متجهماً و على وجهها محاولة ابتسامة ..
تقضي ساعات غيابه محاولة الا تفكر بالاخر …
ينقضي وقت الظهيرة …
يقرع الجرس ..
تدعو الله مراراً قبل ان تفتح الباب هذه المرة ( و كل مرة ) ..
ان يكون الاخر وراء الباب  …
يفتح الباب …..!

و كما المستحيل يكون الأمل !

(٣)

بيديه هاتين وارى ثراها الاخير ..
وقف ايضاً في صف العزاء شاحباً لكل عبارات المواساة ..
لم يهتم ..!
غادر بنفس البدلة السوداء ..
رحل لاشهر ..
خيل له في السراب ان كل الامور اصبحت بخير ..
تخلف عن حضور العديد من مواعيده مع الذاكرة !!
تخيل ان الملاذ في نهاية الاسبوع ..!
غائر ذلك الملاذ ليختبئ بدقة خلف باقي الايام …
يقرر العودة ..
بلهفة ينتظر ان تفتح له الباب لتخبره كم اشتاقت ابنها !!!

و كما المستحيل يكون الأمل !

(٤)

يعلن الحرس المسؤلون عن ذاك المكان بدقة كل ليلة عن موعد النوم ..
يتوجه الجميع بمن فيهم هو لاماكنهم المخصصة ..
مع موعد اغلاق الانوار في العنبر تعلن الساعات المتبقية في اليوم انها اطول ساعات قررت ان تكون !
يراجع كل ليلة شريط محدد اختاره بعناية ( او اجبر على اختياره ) ..
ليقوم بسلخ ما تبقي من جلد نفسيته !
و يقلع اظافر العدل الذي حكم ضده ظلماً ..
و يستحيل ان تمر تلك الليلة بدون استجواب شاق لسؤاله عن اقرب الناس اليه ..
هل هم بخير ؟
أيهمهم أمري ؟
هل عندهم شك ببرائتي ؟
هل علموا ولدي نُطق ( بابا ) دون ان يرتبط معنى الكلمة بشكلي ؟
يسكبوا من عينيه مادة مخدرة يطلقون عليها في ذلك المكان الدموع
( ولو انها لا تشبه دموعنا بالشكل الذي نعرفه )
تجبر العينين ان تغلق أخيراً
يهيأ له كل صباح ان الوضع سيختلف
المكان و الزمان و الناس الملتفين حوله ..
يفتح عينيه ببطء شديد

و كما المستحيل يكون الأمل !

(٥)

كم انتظرت مثل هذا الاحساس ..
تبنته داخلها مذ ان كانت في فترة خطوبتها !
تعلنها اصبحت امام جميع الجميع ..
ان قدرها ارتبط اخيراً بمن تحب … .
سابقت الايام سراعاً لتشعر بها تكبر داخلها ..
اختلفت معه بدلع على الاسم الذي ستحمله ..
فهي منذ الأزل تحلم بحمل رؤى على راحتي يديها !
لم يدم الاختلاف طويلاً …
مضت تسعة أشهر تحمل داخلها مئتان و سبعون حلما !!
تكفل القدر بإجراء عملية قيصرية لها ..
و عملية أخرى تخيره حياتها هي أو رؤى .. !
بعد ساعات طويلة امام غرفة تساق لها العمليات ..
عاشت هي ….

وكما المستحيل يكون الأمل !

(٦)

من عادته ان يعتلي سحابة تمر فوق غرفته كل صباح ..
يسافر معها مغرداً وحده ..
يغني تباعاً ترانيم السيدة فيروز ..
مغادراً معها عالمه الضيق إلى عالم آخر اكبر ..
يتحدى البلبل و النغري و الحسون بغناءه ..
يعود دائماً معه حلم ضخم بأن يتمكن من سماع هذا كله !
هكذا اراد له الخالق ان يكون ..
باربع حواس فقط … !

وكما المستحيل يكون  الأمل !

( خاتمة )

أنتِ كل المستحيلات …
و كل الأمل أنت ..!

Like

Unlike

و المحزن المبكي  بالنسبة لاي شاب عاش في المدينة و تربى فيها
انه نسبة كبييرة كتير من شبابها و سكانها عندهم جهل كبير جداً في حكاية الاماكن الاثرية
و الاثر الكبير اللي كان من بعد سيدي و سيد الخلق رسول الله عليه وعلى اله افضل الصلاة و اتم التسليم ..!

بشكل عام ..

ما درسنا فمدارسنا اكتر من ١٠ ٪ عن دي الاثار او اماكنها او فضلها حتى
و درسنا باكتر من دي النسبة بكتييير  عن الاثار في قصر المصمك و الدرعية و غيرها ..
حتى اي شخص الان حاب يعرف عن اثارنا هنا و حب يعمل سيرش بسيط في النت او بالطرق التقليدية ..
فمن البديهي جداً .. انه اذا بحث عن ١٠ اماكن اثرية يزورها في السعودية .. ٥ منها ع الاقل ماهي من اثار الرسول عليه الصلاة و السلام ، اللي انا برايي الشخصي اعتبره عليه صلاة الله وسلامه من اهم الاسباب اللي عمرت دي الارض بالزات = )

اللي خلاني اكتب عن دا الموضوع ..

اتقدرلي يكون لي علاقة ولو من بعيد شويا مع احد الناس المهتمين باثر مهم جداً في المدينة المنورة ..
واللي هوا بئر غرس ..

ويقع حالياً داخل املاك لاحد الاشخاص من اهل المدينة الافاضل ..

المهم في الموضوع ان صاحب دي الاملاك كان اتكلم عن انه يتمنى يكون دا المكان مشهد تاريخي لبئر هام لينا احنا كمسلمين برأيي بسبب حب الرسول عليه الصلاة و السلام فكان عليه الصلاة و السلام يحب ماء دي البير ، حتى انه وصى سيدنا علي لما حضرته الوفاة بأن [إذا مت فاغسلني من بئر غرس بسبع قرب]..
حتى انه قال فيها عليه افضل الصلاة و السلام عن ابن عمر رضي الله عنه قال: قال رسول الله صلى الله عليه وسلم وهو قاعد عند بئر غرس [رأيت الليلة كأني جالس على عين من عيون الجنة]، يعني بئر غرس.

فاي شي اكتر من كدا .. ؟

فصاحب دي الاملاك كان عنده اقتراحات بانه يكون دا المكان مزار و ينعمل كمكان اثري حتى يتمكن الناس من شوفته او ع الاقل المرور فيه تحت اي شرط كان نضمن فيه تعليم الناس و ننتبهلهم من اي بدعة ممكن تجي فبالهم عند زيارة دا المكان ..
لكن للاسف بشكل مباشر او غير مباشر اتواجهت دي الهمة بصد شديد و تهديد فبعض الاحيان بهدم المكان و ازالة الاثر من اصلو .. = )

و دا مجرد مثال بسييييط جداً لما واجهته اثار كتيرة في المدينة المنورة من هدم و ازالة عن بكرة ابيها بدون ترك اي دليل او اثر يدل عليها بعد كدا

ومن اهمها و الجدير بالذكر فيها القرار اللي صدر قريب بهدم مسجد الفتح في منطقة المساجد السبعة اللي وقعت فيها غزوة الخندق
واللي بقي منها فقط ٣ مساجد هي مسجد الفتح و مسجد سيدنا سلمان الفارسي و مسجد سيدنا عمر ..
بينما الخطة المحطوطة ع زعم تطوير المنطقة بمبلغ ٢١٤ مليون دولار لازالة المساجد التاريخية و استبدال مكانها مسجد كبير ما سمعت للان واللهي انو في احد من اهل المدينة اللي اعرفهم ع الاقل صلى فيه ركعة  ..

و مسجد الفضيخ اللي ازيل من فترة طويلة و للاسف اغلبنا كان ما يعرف دا المسجد من اساسو

دا غير الابار اللي انهدمت و اهمها بئر الخاتم و غير المزارع اللي ازيلت و النخل الشهير في مزرعة سيدنا سلمان الفارسي اللي ازيل قبل سنوات قليله
و غير الاسوار و المباني اللي ما نعرف عنها ولا عن مكانها اي شي

و التناقض العجيب فنفس الوقت .. انه من كم سنة اتكتب في الجرايد عن ترميم حصن اليهودي كعب بن الاشرف في المدينة المنورة
وماتكتب اي شي عن هدم مكان واحد من اللي ذكرتها فوق دي

و من التناقض الغريب و الاغرب و العجيب جدا جدا برايي

انه ايهما احق بالاهتمام و الترميم اكتر الحصن ولا بير العهن مسلن ؟

مشربة ام ابراهيم و لا مدائن صالح مثلاً ؟

٢١٤ مليون دولار لهدم مساجد تاريخية و اثرية وليها فضل علينا و على كل مسلم بيتنفس فدي الارض ،، ولا اقل من ربع دا المبلغ لترميم مسجد واحد من السبعة اللي اتهدمت ؟؟

مدائن صالح اللي بيندفع الان مليارات عشان تكون معلم سياحي عالمي و تدخل عجايب الدنيا

و ينبني فيها اكتر من ٣ منتجعات سياحية لمنطقة كان الرسول عليه الصلاة و السلام يكره المرور فيها و يحث ع الاسراع لمن يوصلها و يمشي من جمبها و احنا بننظملها رحلات شبه يومية و معسكرات و مخيمات بالهبل جمبها ؟؟

مشاريع ياكترها ولا مشروع صغير انو يصير في كشك صغييييير قدام كل اثر من دي الاثار العظيمة يعلمو الناس فيلو الصح من الغلط و الحلال من الحرام  وسور حوالينو احنا راضيين عشان ما يخش اي احد ؟؟

و سنة بعد سنة بينسوا اهل المدينة و شبابها دي الاثار

فابدن ماهو غريب اليوم وانا بتكلم عن شوية اثار انا شفتها بعيني قدام اصحابي في القهوة و اليوم مي موجودة .. و النص التاني من الشباب ماهو مصدقني لمن احلف انو اصلن في اثار تانية عمرهم ما سمعو عنها انها موجودة في المدينة المنورة

و تقريبن من داكا اليوم و سرت استحي اكتب اشياء تانية بسبة ردة الفعل العظيمة اللي جات من ورا البلوق ^^,

بس حالين وبما انو الموضوع شاغلني لو فترة و قلت بلكن يا سيدي الحكاية مزبوطة و يجي متخلف تاني يقتنع بكلامي و يساعدني فيه ويسير عندنا شي انا وياه نقدمو للناس ..

طبعن يمكن يكون السبب الاساسي بدي الحكاية انو كترة ما بشوف مسلسلات يمكن عن دي الاشياء و شكلي يا اني اتاسرت فيها او شي زي كدا =(

خليني ابدا هما كيف يحكوها ..

واحد من المسلسلات اللي مرره الواحد يتمني يعيش فيها هوا Heroes و كيف انه في بني ادميين بسبب تجارب قديمة سارو يقدرو يكون عندهم قدرات
ففكرتهم انو اساس دي القدرات جات من لمن اخدو ابر لعبت في الادرينالين حقهم خلت كل واحد فيهم عندو شي غير
فمنهم اللي بيطير واللي سريع و اللي بيقدر ينتقل من مكان لمكان ولا بينتقل بالزمن

يعني حاجة لا احكيكم خراافة p=

فكرتهم منطقية – بالنسبالي ع الاقل – لو انو قسناها ع حكاية البني ادم لمن بيرتفع عندو الادرينالين بشكل طبيعي يسير اصلن عندو شي زيادة
يعني زي مسلن لمن يكون الانسان في مضاربة فجاه بيحس يا انو يبغى يجري خايف من الشي دا ولمن يجري بيكون اسرع انسان في الدنيا
او انو احيانن بيسير بيضرب ضرب من جد بقوة مرره مي حقتو .. او ع الغالب انو بيتلطش بس ما بيحس بالضرب اللي عليه الا لمن بعدييين تخلص المضاربة ..

فدا كلو من باب انو في شي بيتغير لمن بيرتفع الادرينالين فجسم الانسان فبدايتن دا الشي يوصل للشي اللي فبالي ^_^

المسلسل التاني اللي جاب نظرية تسدح بصراحة و كمان من اروع المسلسلات اللي بشوفها
Fringe .. فوحدة من حلقات دا المسلسل اتكلم عن نظرية Deja Vu .. بطريقة مرره دخلت مزاجي

فدا الفيديو هوا بيوصل لنتيجة انو لو طولت مدة الديجافو فبكدا يسير امدي الواحد يكون في البعد التاني فترة اكتر

الفكرتين دول و كتير افكار تانية ببالي بتوصلني انو هل انو احنا من جد لو قدرنا نتحكم باننا نزيد دي الاشياء الطبيعية في الانسان – الديجافو و لا الادرينالين رش – بطريقة معينة يسير امدينا نوصل لنتايج اكتر من طبيعية في الانسان ؟

فكرتي كانت متمثلة بالزات لموضوع التيلي بورتيشن و كيف انو الواحد ممكن يتنقل لمكان تاني بسرعة بطريقة يكون متحكم فيها بنفسو

ع كلام والتر بيشوب انه بيسير في بعد تاني عايشين فيه او بالاصح متعايشين معاه ..
كل الفكرة انو انا لو قدرت اوقف اللحظات دي اللي بعيش فيها في الديجافو بحيث اني اطول في البعد التاني دا ..

فانا حسبتها ع اساس انها طاقة بتتولد من الانسان .. ( اي انسان ) !!
بتتفاعل بطريقة او بتانية في الطاقة المحيطة فيه و بنفس الوقت بالطاقة اللي جايه من البعد التاني دا اللي بنقول عليه ..
عشان كدا وقتها بيسير ديجافو ..

طيب لو انا قدرت ازيد دي الطاقة اللي بيولدها دا الانسان .. او قدرت اجيب عامل او اله تانية مسلن بتزيد الطاقة في المحيط اللي حواليا ..
رح نوصل لنتيجة انو يمدينا نطول في البعد دا التاني بشكل اكبر ..!

بنفس الوقت اشوفها من زاوية تانية ..
انو الديجافو بيخلينا نشوف شي كانو شفناه قبل كدا !!

يعني انو الحكاية فيها انو الزمن ما بين البعد حقنا اللي عايشين فيه و البعد التاني مختلف ماهو نفس الزمن

بدليل انو لمن انتقلنا السواني البسيطة دي للبعد التاني قدرنا نشوف شي رح يسير في بعدنا بعد اجزاء بسيطة من السانية !

Einstein زمان كان عندو النظرية اللي بتقول

that time slows down for fast-moving space travelers, effectively keeping them young. Space radiation acting on telomeres could reverse the effect

بمعنى شبيه انو سرعة الجسم و انتقالو من مكان لمكان بتأثر في الزمن بشكل واضح

طيب لو احنا اتحكمنا بسرعة دا الشي و فنفس الوقت عرفنا نطلق دي السرعة في البعد التاني بشكل عرضي نوصل لنتيجة انه بامكاني اكون في اي مكان في البعد التاني بشكل اسرع بكتيييير من هنا
وفنفس الوقت اقدر اوقف دي العوامل عشان ارجع للبعد دا حقنا بنفس الوقت ..!

اوكي انا عارف نفسي ما افهم ريال في الفيزيا بس المنطق ابن حرام عجبني

فبلكن بلكن يا رب يا رب بجاه وجهك الكريم يسير عندي دي القدرة واني اقدر اتنقل من مكان لتاني بسرعة جداً

ايوه صح اللي كان متابع داكا الموضوع حق الـ DNA او دوبو فتحو و قريه اطمنكم انو اتغيرت وحلقت ع الصفر تمامن

ودا لحالو دليل انو كتير اشياء بكتبها بتتغير و عقبال ما يسير اللي بقلكم عليه ^_^

نورتونا والله .. واي حدن عندو لاب نقدر نسوي فيه تجارب زي كدا يتصلبي عشان نتفاهم !!

Like

Unlike

الفلم من كتابة و اخراج Niell Blomkamp ( اللي يعتبر دا الفلم الرابع ليه كمخرج )
و قام بدور البطولة ( اللي اعتبره نجح في تمثيل الشخصية دي كتير مع انو غير معروف كتير ) الممثل Sharlto Copley بدور Wikus Van De Merwe

تبدا حكاية الفلم بطريقة التصوير الوثائقية اللي بتحكي قصة سفينة فضائية جات ع الارض سنة ١٩٨٢ و وقفت فوق مدينة جوهانسبرغ في جنوب افريقيا
ولما تجي الحكومة تفتح السفينة تلاقي فيها الاف من الكائنات الفضائية اللي حالتها معدومة ع الاخر .. فتقرر الحكومة بمساعدة الجهاز الدولي المسؤول عن شئون الفضائيين اللي مسمينو MNU انها تسكنهم تحت السفينة مباشرة و تعاملهم كلاجئين تقدملهم الاكل و الشرب و المكان و كدا .. !!

بداية الفلم يكون التصوير زي ما قلت بشكل وثائقي و بطريقة الشيكي كام .. ودا اكتر شي بصراحة يخليك تتشد للفلم في البداية الاحداث و طريقة عرضها و تصويرها انه في احداث جاية مي طبيعية !!

يكمل الفلم حكاية الفضائيين و كيف انو الحكومة قررت تنقلهم لمكان جديد بدل المنطقة ٩ – فيتقرر تعيين (فيكوس) اللي مالو شغل في العمل الميداني انو يقود العملية الميدانية المسؤولة عن نقلهم للمكان الجديد اللي يبعد عن مكانهم الحالي حوالي ٢٠٠ كلم .. في دي العملية يتصاب العميل ( فيكوس ) بسائل معين يخليه يتحول و يسير من الفضائيين او نص بني ادمي و نص فضائي و يبدو يحاربوه و كدا .. !!

دي قصة الفلم بالمجمل .. اللي ما اعرف ليش استاهل ياخد ٨.٥ في imdb و انه يحتل المركز ٧١ في قائمة افضل ٢٥٠ فلم في التاريخ ..

الفلم ملئ بالسخافات و الاخطاء المنطقية اللي تتفه من الفلم ابداها من الاول اللي هي

١- طريقة عرض الفلم في البداية تنبأ بفلم مليان احداث جديدة ما تعودناها لكن للاسف من بعد اصابة ( فيكوس ) يبدا الفلم يسير عادي زيو زي اي فلم بيحكي حكاية فضائيين و كيف انو البشر اشرار و كل الحكومة تسير تبغى تحاربو ..!! ( الله يرحم ايامك يا E.T. ) ^ـ^

٢- الفكرة اللي سارت في المجمل انو دول الاوادم جو فوق المدينة سنة ١٩٨٢ و احداث الفلم ع اساس انو فسنة ٢٠١٠ يعني بعد ٢٠ سنة قررو ينقلوهم لمكان جديد بعيد عن سفينتهم اللي قعدو تحتها ٢٠ سنة وما عرفو يشغلوها و يرجعو بلدهم حتى انو احنا هنا سكان الارض عادي لو جات زي كدا سفينة فضائية فيها دول الشي رح نقعد عادي نخليهم يعيشو بيننا ومارح نهري ابوهم اختبارات و تحاليل و نفصفص سفينتهم الين ما نعرف اش فيها و كيف تشتغل ولا انو يقتلونا ولا نقتلهم عن بكرة ابيهم .. ما عادي يومتها العراق بتكون رجعت و فلسطين انحلت قضيتها و ماعاد في ارهاب بس ما عندنا شي الا دول الكائنات اللي اهل جنوب افريقيا بس متعايشين معاهم و باقي العالم طبيعي مكمل حياتو ولا على بالو !!

٣- بيورينا الفلم كمان كيف انو دي الكائنات الفضائية مرره همجيين في البداية و كيف انو حياتهم زبالة و بياكلو اي شي و بيقتلو بعض بقمة الهمجنة و دا الشي اللي يخلينا نفكر كيف انو دول الهمجيين عندهم كل دي التكنولوجيا في الاسلحة و السفينة حقتهم !!

٤- كمان دول المخلوقات كانو عادي مع كل الاسلحة المتطورة اللي عندهم و اللي ما في احد غيرهم ينفع يشغلها ما استخدموها عشان يتخلصو من الحصار اللي عليهم او يهاجمو الجيش اللي جا يقتلهم و يشردهم ببساطة لا كان عندهم استعداد يبادلوها بعلبة اكل بسس ولا وحدة افريقية يباتو معاها ..

٥- كيف انو لمن بدي ( فيكوس ) يتحول سار تفكير الـ MNU بدل ما يدرسوه و يدرسو حالتو و يعرفو يستفيدو منها سار كل همهم انو كيف يخلوه يشغل الاسلحة حقت الفضائيين

٦- من اسخف الايفكتات اللي شفتها بحياتي هيا تاثير الاسلحة لما بيستخدموها حقت الفضائيين يعني مع كل ابداع المخرج في اللقطات و التأثيرات و زوايا العرض كانت تأثيرات الناس لما تتفجر من الاسلحة كانها فلم من السبعينات ع الاغلب ..!

٧- الهفوات البسيطة كمان تتفه الفيلم بزيادة .. لمن يكون دا الادمي مطلوب و ماهم عارفين يجيبوه و قاعدين يستنوه يتصل عشان يعملولو تراكنق بدل ما كان يعملو دا الشي ما دام الموبايل حقو شغال من اول .. كمان لمن يقتحم المبنى حقهم و بكل بساطة نفس الكودات اللي كانت لمن هوا موجود بقيت زي ما هيا خصوصي القسم اللي ماكان هوا نفسو يعرف عنو بس يعرف الكود اللي يفتح الباب حقو !!

٨- كتير اشياء كمان غبيه في الفلم دا .. بس اسخفها كمان لمن اخينا يشغل السفينة ويجي يبغى يروح يترك كل الفضائيين اللي معاه ع اساس يجيهم بعد ٣ سنين بغض النظر عن الفوضى اللي كانت سايرة و انهم كانو مستعدين يبيدوهم كلهم بس هوا عادي شغل السفينة الضخمة اللي مافيها اي ميزات انو توقف كمن دقيقة تاخد الباقي و تمشي !!

بصراحة كتييير كمان اشياء بس دي اهم الاشياء اللي تسخف الفلم بدرجة كبيرة و من جد اش اللي مخليه ياخد كل دي الهيلمة ماني فاهم !!

ع العموم متابعة ممتعة p=

ايوه صح احلى شي في الفلم الترايلر تبعو ^^,

Like

Unlike

I felt like it’s really not that good and that was the main reason for me to stop blogging ..

now I finally had my chance to change into a new style from WooThemes .. which I really do like it =p

on the other hand I’ve upgrade the WP version up to the last 2.8.4 version so now I could announce that the whole blog is new

7atta ree7at el boya lessa feeh =p

Hello World again .. w nshofakum 3ala 5eer ^_^

Like

Unlike

خمسة اشهر كفيلة بأن تحلل الباقي من عظامنا تحت التراب ..
و هي كفيلة ايضاً ان نعيد فيها احياء ذكرى اي رحيل كان … او اي رحيل اخر متوقع …

مرة اخرى اعيد شراء العديد من الاشياء لانسق حديقة خوت ..
هذه المرة ساغرس في منتصفها عبارة ..
سأجمل حروفها على النمط الخارق للعادة ..
حولها سأزرع كمية من شجر الحرية .. متناغماً مع العديد من ازهار الوحدة و اوراق السفرجل ..!

هناك في الخلف ساضع ذلك الكرسي المعتق ..
والذي بالمناسبة عدلته لكيلا يهتز عند اي علاقة عابرة ..
فالان بات واقعياً اكثر ..
حتى لونه المائل للاحمر تغير .. و اصبح بلوني المفضل = )

سابني كوخاً .. نعم كوخٌ ترتفع حوله مدخنة ..
ترجوكي العودة بعد كل صلاة ..
لها نفس رائحتك ..
و ترسم خيوطاً في الافق كما اصطفاف خصلات شعرك ..

هناك في ذلك الركن من الحديقة …
سأزينه بحكايات كنت اراها في منامي ..
ساجعلها من النوع طويلة الامد …
سأسقيها كيف تنتظر ..؟ و اعلمها على ان تحترم جنونك المفقود ..!
لن ادعها تستلم عندما تحاولين قطفها في خضم رغبة فراق ..
او ان تذبل لمجرد اختفاء ظلك … !

مممم سيكون حولها سور ..
لن يكون بذلك الارتفاع .. بل اقل
ساجعله يلتف حولها كلما اشتاقك ..
ستهب كل نسمة من خلاله لتهمس في اذنك ..
سيكون بلون عينيكِ … لكنه اوسع ..
سيحتويني و يحتوي حديقتي بطاعة عمياء … بل اكثر !!

ساجعل فيها ركناً للصلاة ..
فيه سجادة و مبخرة و مسبحة فيها الكثير من الذكر ..
ستتجلى في ذلك الركن الرؤى ..
لن يصلي فيها احدٌ سواك ..
ستكون مهيأة فقط لتتشبع من دعائك …
و سأعلمها أيضاً كيف تؤمن خلفك …
وكيف ترفع الدعاء لكي يستجاب …

سأغرس فيها نخلتين …
من ذلك النخل العالي بعيد المنال ..
ستثمر كل سنة عالياً لكي انظر اليها فقط ..
حتى إذا ملّت عيناي الانتظار ..
قدمت لي هي كل ما كنت احتاجه ..
تماماً كما أنت …!

خلفها ستكون محاطة ..
بتاريخ ثورة أمة
او منشأ تاريخ لأخرى ..
فطالما رأيت حبك أسطورياً ليس لأن ينسى ..
و لا لتكفيه كتب التمجيد و التعظيم و بلاط السلاطين و نشرات الاخبار ..
و بلحظة ستعلن نفورها من حكم جائر ..
لتستقيل و تعود مرة أخرى أسيرة لهواك ..

هكذا هي حديقتي ..

مهلاً ..

أاخبرتك عن مالذي قد كتبت على تلك العبارة .. ؟

Like

Unlike

فكرة المقال عن انو كيف ممكن نخلي التويتر مكان يطورنا من ناحية التصوير اكتر .. !!

إزا لسا منك في Twitter فممكن انك تحسبو اساسن مكان عشان الناس تجي تكتب اش اتعشو امس .. ؟ولا من فين رايحين يشترو بكلة الشعر حقتهم .. ؟
ودا شي ساير هناك بس انو مع كدا هو فرصة و مكان مررره ممتاز عشان تقدر تطور من نفسك بيلو ..!!

كيف كدا ؟

انا مثلا من الناس اللي تحب التصوير .. و خاصة حكاية تصوير البورتريه ..
فبكل بساطة رح اتابع كل الناس اللي مهتمين بالتصوير و بتصوير البورتريه هناك من لمن اعمل سيرش عليهم = )

فبالتالي دي خمس اشياء ع الاقل رح تخلي Twitter يطور ادائك في التصوير .. !!

١- دوّرو على مصورين جداد ..
بمجرد ما انو نعمل Follow للمصورين دول فاحنا ارتبطنا بيهم من ناحية انو سرنا نقرا اخبارهم اول باول ..
نتكلم معاهم .. نرسلهم ملاحظاتنا .. كتير منهم رح يكونو مبسوطين بانهم يردو علينا و يساعدونا ..

٢- اخبار جديدة اول باول ..
برضو اغلبية المصورين الكبارية اللي بنتابعهم هناك
رح يضلوا يعملو ابديت بالاخبار الجديدة في التصوير و اش اخر تكنيك عملوه ولا اش اخر الحاجات الجديدة في السوق ..

٣- خدو رأي الناس بصوركم ..
لمن يكون سار عندنا عدد من الناس اللي بتتابعنا من المصورين هناك .. رح يسير سهل علينا انو نعرض صورنا الجديدة عليهم عشان ناخد رايهم و نحسن ادائنا
بس حط لنك لصورتك الجديدة و اسال الناس اللي بتتابعك عن رايهم بيها ( او ممكن نعملها بطريقة محددة اكتر انو نحط اللنك و نسالهم انو مممم دي الصورة مو كانها اوفراسكبوزد ؟ )

٤- اسألو و خدو اجوبة ..
الحلو في الموضوع انو تاخد اجوبة مباشرة على اي سؤال ممكن تحطو عن التصوير ( يعتمد بدرجة كبيرة ع عدد الناس اللي بتتابعك )
ودي حلاوتها انو بتاخد اجوبه واضحة و على طول = )

٥- تويتر يعلمنا نكون مختصرين ..
بما انو التويتر ما يمديك تكتب اكتر من ١٤٠ حرف فيلو .. فدي حاجة كويسة عشان نكون مختصرين و محددين احنا اش نبغى بالزبط
سواء باسألتنا او بإجوبتنا ع الناس .. كدا نكون قدمنا الشي المباشر اللي احنا نبغاه و سمعنا تمامن الشي اللي نبغى نسمعو ^_^

كيف نستفيد من تويتر باكتر حاجة ممكنة : هوا انو ندي اكتر من ما ناخد = )

لانو تويتر مو بس عشان نقرا افكار الناس و لا نشوف اخبارهم و نجي ماشيين .. لا
الحكاية انو ماحد رح يعبرنا ازا ماكنا نشيطين هناك .. نحاول نساعد الناس اللي بيتابعونا و نتابعهم ازا احتاجوا شي احنا نعرفو
عشان في الوقت اللي نعرض فيه شي ع تويتر يكونو جاهزين يسمعو مننا ^_^

وكيف نبدا بدا الـ Twitter .. ؟

اوكي ..

اول شي .. خلينا نسجل اكاونت جديد في www.twitter.com

تاني شي .. دورو على الاشياء المختصة بالتصوير عشان نتابعها .. ( هادي شوية اكاونتات لناس عشان نستفيد منهم : Scott Kelby / Steve Brardi / @artwolfe / @chasejarvis / @jeremycowart / @neilcreek / @jimgoldstein / @ricksammon / @scottbourne / @zarias / @strobist/ JunkieeNet )

تالت شي .. نبدا ننطلق في تويتر .. نتشارك المواقع الكويسة .. نرد ع الناس .. نحط صورنا اللي اخدناها …. و زي كدا ^_^

اتمنى نشوفكم هناك قريب = )

Like

Unlike