حكاية ..!

كان يا مكان في زمان قديم من الزمانات .. 

كان في حدن اسمو سليم .. 

هالـ سليم اتولد مع مواليد برج القوس سنة 1985 م .. ولدتو امو ( رحمة الله عليها ) في مستشفى النسا و الولادة اللي كانت جمب الحرم النبوي في المدينة المنورة ( على ساكنها أفضل الصلاة و أتم التسليم )

بعد كمن سنة و كدا حوالي سنة 2001 خلص الادمي دا دراسة السانوية العامة من سانوية عبد العزيز الربيع

واتوجه ع اساس يكمل دراسة جامعية في سوريا ..
وكانت البداية في جامعة القلمون – دير عطية .. و قعد بيها حوالي سنة يدرس هندسة اتصالات و الكترونيات
هنا ساعتها ايقن اخينا انو الحكاية ما مشي حالها معاه في دي الجامعة و قرر انو يرجع للمدينة مرة تانية اقلها انو حكاية ستر و غطا   ^_^

في المدينة سجل في معهد خاص عشين وقتها ما كان في جامعات خاصة و ماهو مسموح اصلن انو اللي ماهم سعوديين يسجلو في الجامعات الحكومية  ..

فخلص دراسة دبلوم في تقنية المعلومات من معهد جدة الدولي للكمبيوتر ..

بعدها كانت بداية حكاية الشغل و كدا  ..

فاشتغل في شركة مقاولات في المدينة اسمها سالكو ) او الشركة السعودية للتزيين بالنبات )
بس بعد تلات شهور سابهم و راح اشتغل في شركة تانية اسمها المبدعون ( شركة اشراف هندسي )

كمان برضو بعد سنة من الزمان رجع عاطل لانو من الاساس ما كان عاجبوا الشغل فدا الموضوع  p =

خلال دي الفترة اللي هيا فـ 2005 اتعرف ع مجموعة كويسين اسمهم كان مجموعة صناع الحياة السعودية .. واللي كانت من أكبر الخطوات اللي استفاد منها بحياتو ..
منها اختلفت النظرة تمامن للواقع اللا كان عايش بيه .. 

ايوه صح .. 

تقريبن فنفس الفترة حقت الصناع كان اصلن قبلها مهتم بالتصوير و التصميم و دي الامور  ..
لكن فديكا السنة قرر انو يتنقل و يتخصص في انو يتعلم دا المجال شوية اكتر .. ومنها بدي و اشترى كميرتو الأولى
 Nikon D70s .. ( بعد فضل ربنا كان فضل الاستازة ورقاء الموافي اللي مرره ساعدتني فدي الحكاية في البداية و مستحيل انسالها داالفضل ^_^  .. )

في صيف سنة 2007  كان أول معرض مشترك يشارك بيلو باسم ( بقعة  ضوء ) ..

بعدها كانت بداية الانتقال لجدة عشين يشتغل في الشركة السعودية لاستيراد و تصدير الورق SIMPEX و اللي مازال يعمل فيها الين دحين = ) ..

خلال دي الفترة حصلت حادثة فظيعة واللي هيا خلال وحدة من الرحلات لتصوير منطقة اسمها الوعبة ( او مقلع طمية ) و هناك خسر كل العدة و الكاميرا اللي كانت معاه راحت كلها في سفح دا البركان .. << حلوة سفح ولا .. ؟

بعدها بشهر تقريبن أو أقل قدملوا مجموعة من أصحابو ( أو أخوانو اللي هما أحمد مفتي و علاء محجوب و عمار بيتموني ) هدية جديدة واللي هيا كميرتو اللي معاه دحين Nikon D300 .. و اللي من جد كانت أروع الاشياء اللي سارتلو خلال حياتو ..

دي الفترة اللي هيا بجدة كانت من أكتر الفترات اللي اتعلم بيها بحياتو ..
وفعلن والله اختلف مستواه في التصوير بشكل كبير جدن خلال دي الفترة و لله الحمد ..

و توته  توته خلصت الحدوتة ^_^